Tynysyńdy ashatyn salqyn jupardy qushyrlana jutyp, qumaryń qanǵansha syrǵanaq tebý qys aılarynyń bir keremeti. Qysy qatty qyspaqqa almaıtyn Almatylyqtar úshin bul ıgiliktiń orny tipten erekshe deýge bolady. Byltyr shahar turǵyndaryn aıryqsha qýanyshqa bólegen qaladaǵy tegin syrǵanaý alańdary bıyl da qys túse salysymen qaıta ashyla bastady.
Bıylǵy maýsymda Almatylyqtar úshin alǵash esigin ashqan alyp syrǵanaý alańy Atakent kórme ortalyǵynyń irgesinen oryn tepken. Táýlik boıy úzdiksiz jumys isteıtin syrǵanaý alańyna salamatty ómir saltyn ustanatyn qala turǵyndary men megapolıs qonaqtary qalaǵan ýaqytynda kelip aqysyz syrǵanaq teýip sergip qaıta alady. Tipti mundaǵy arnaýly nusqaýshylar, kelýshilerge tegin keńes berip qyzmet kórsetedi. Aldaǵy kúnderi qalanyń 10-nan astam núktesinde ornalasqan mundaı oryndar almatylyqtarǵa qushaq ashatyn bolady.
Joǵaryda aıtqanymyzdaı táýlik boıy jumys isteıtin syrǵanaý oryndary barlyq kelýshiler úshin aqysyz. Tek demalýshylar ózimen birge konkılerin ala kelýi tıis. Sondaı-aq syrǵanaý alańdarynyń mańynda tamaqtanýǵa arnalǵan arnaýly oryndar men konkılerdi jalǵa berý ortalyqtary jumys isteıdi. Uıymdastyrýshylar olardyń baǵalary buqara halyqqa qol jetimdi bolýy árdaıym qadaǵalanyp otyratynyn aıtady.
Syrǵanaý alańqaılarynyń barlyǵy zamanaýı standarttarǵa saı jańa tehnologııalardyń kómegimen jasalady. Eń bastysy Almatynyń myń qubylǵan aýa-raıyna oraılastyrylǵan. Muz alańdary kún raıy qalaı bolǵanyna qaramastan, tipti 10 gradýs jyly bolsa da erimeı qatyp tura beredi. Iаǵnı, alańdardyń arnaýly tońazytqysh quraly muzdy eritpeýge qolaıly temperatýrany qamtamasyz ete alady. Qala jurtshylyǵyna qýanysh syılaǵan áleýmettik jobany júzege asyrýǵa qala ákimdigi muryndyq bolyp otyr.
– Syrǵanaq tebý sanańdy sergitip, deneńdi jattyqtyrýdyń eń tıimdi tásili ǵoı. Oıyn-saýyq ortalyqtaryndaǵy muz aıdyndaryna barǵanda byraz shyǵyndalatynbyz. Byltyrdan beri osy tegiń syrǵanaý alańdaryna keletin boldyq. Bul da qarapaıym turǵyndar men stýdent jastarǵa jasalǵan úlken kómek dep esepteımin, – deıdi qala turǵyny Bekzat Nurymetov.
Syrǵanaq alańdarynyń esigi kóktemniń alǵashqy aıyna deıin aıqara ashyq. Jolyńyz túsip arý Almatyǵa kele qalsańyz, Alataýdan esken salqyn samalmen tynystap, syrǵanaq teýip sergip qaıtýdy umytpańyz, oqyrman!
Arman OKTIаBR,
«Egemen Qazaqstan»
ALMATY