Qazaqstanda tottanýǵa qarsy nemis tehnologııalaryn synaqtan ótkizý úshin pılottyq joba bastaldy. Bul týraly «Turǵyn úı kommýnaldyq-sharýashylyǵyn jańǵyrtý men damytýdyń qazaqstandyq ortalyǵy» AQ baspasóz qyzmeti habarlady
Elimizdiń jylýmen jabdyqtaý qubyrlarynyń qyzmet etý merzimin uzartýǵa jáne nyǵaıtýǵa arnalǵan arnaıy quraldardy ornatý jáne synaqtan ótkizý jónindegi qanatqaqty joba jumysqa kiristi. Joba «TKSh QazOrtalyǵy» AQ men Merus nemis kompanııasy arasyndaǵy kelisim aıasynda iske asyrylýda. Astanada «Astana-Teplotranzıt» AQ alańynda aspaptardy tájirıbelik paıdalaný bastaldy jáne Qyzylordada jalǵasady.
Germanııa ókilderi habarlaǵandaı, Merus tehnologııasyn kóp jyldyq qoldaný tájirıbesi jylý jáne sýmen jabdyqtaý júıelerinde paıdalaný kezinde olardyń joǵary tıimdiligin kórsetti. Qubyrdyń aınalasynda ornatylǵan arnaıy saqına qubyrjoldar men ilespe jabdyqtardan qaq, tot jáne bakterııalardy alyp tastaıtyn molekýlalyq terbelister túzedi. Bul bólshekter qubyrdan jýylyp, júıeniń bastapqy joǵary ónimdilik sıpattamalaryn qalpyna keltiredi jáne ekologııalyq qaýipsizdikti qamtamasyz etedi. Mundaı tehnologııa úıler men ǵımarattardy jylytý jáne tehnıkalyq qyzmet kórsetý shyǵyndaryn aıtarlyqtaı tómendetýge múmkindik beredi.
«Astana men Qyzylordada tájirıbelik paıdalaný 5 aıǵa sozylady. Osy kezeń ishinde mamandandyrylǵan zerthanalar zertteýler júrgizetin bolady. Pılottyq jobanyń oń nátıjeleri arqyly jobany QR basqa óńirlerinde iske asyrý úshin odan ári yntymaqtastyq múmkindigi qaralatyn bolady. Sonymen qatar biz basqa da sheteldik tehnologııalardy Qazaqstannyń turǵyn úı-kommýnaldyq sektorynda synaqtan ótkizý úshin zertteımiz», – dedi «TKSh QazOrtalyǵy» AQ Basqarma tóraǵasy Nursultan Jıenbaev.
«Astana-Teplotranzıt» AQ Basqarma tóraǵasynyń birinshi orynbasary Sergeı Golevtiń aıtýynsha, Astanada sońǵy 2 jylda tek magıstraldy jylý jelileriniń 40 shaqyrymnan astamy paıdalanýǵa berilgen.
«Qubyrlardyń sapalyq sıpattamalaryn saqtap, múmkindiginshe uzaǵyraq qyzmet etýi óte mańyzdy. Jylýmen jabdyqtaý júıeleriniń senimdiligi men únemdiliginiń tómendeý sebepteriniń biri qubyrlardyń ishki totyqtanýy bolyp tabylatyny belgili. Sondyqtan da biz tottaný jyldamdyǵyn baıaýlatyp, jylý tasymaldaǵyshtyń sapasyna oń áser etetin ozyq tehnologııalardy baıqap kórýge ári synaýǵa daıynbyz», – deıdi Sergeı Golev.
Aıta ketý kerek, Astana qalasynda Merus aspaptaryn ornatý jáne synaqtan ótkizý jónindegi pılottyq joba Astana ákimdigi, «Astana-Teplotranzıt» AQ jáne «Astana Sý Arnasy» MKK qoldaýymen júzege asyrylýda. Tutastaı alǵanda TKSh sektoryna neǵurlym ozyq jáne tıimdi sheteldik tehnologııalardy tartý boıynsha jumysty QR Investısııalar jáne damý mınıstrliginiń salanyń energııa tıimdiligin arttyrý jáne sáýlet, qala qurylysy jáne qurylys qyzmeti salasyndaǵy ulttyq ınnovasııalyq júıeni damytý salasyndaǵy 2017-2021 jyldarǵa arnalǵan strategııalyq josparyn iske asyrý sheńberinde «TKSh QazOrtalyǵy» júrgizip jatyr.
Aınash ESALI,
«Egemen Qazaqstan»
ALMATY