Búgin Astana qaıyrymdylyq Grand balynyń debıýtanttary Qarttar úıinde qaıyrymdylyq konsertin ótkizdi.
Shara shymyldyǵyn Astana qaıyrymdylyq Grand balynyń negizin qalaýshy Alpamys Shárimov ashty:
«Táýelsizdik, Jańa jyl merekeleriniń qarsańynda búgin sizderdi arnaıy quttyqtaýǵa kelip otyrmyz. Bul 18 jeltoqsanda ótetin kesh aıasynda uıymdastyrylyp otyrǵan shara jáne sol keshke biz sizdermen birge tosynsyı daıyndaıtyn bolamyz», dedi ol.
Konsert bastalǵannan qarııalardyń kóńil-kúıine erekshe áser etti. Áýezdi ánnen bastalǵan kesh sahnany árleı túsken ulttyq bımen jalǵasty. Shara kezinde birde-bir qarııany nazardan tys qaldyrmaǵan uıymdastyrýshylar birge bı bılep, án shyrqap, túrli oıyndar oınatty.
Qaıyrymdylyq Grand baly eń alǵash ret Alpamys Shárimovtyń uıymdastyrýymen 2015 jyly Oral qalasynda bastaý alǵan, ol estip-sóıleý qabiletinen aıyrylǵan balalar mektep-ınternatyna arnalǵan kesh bolatyn.
«Men 4 jyl qatarynan Oral qalasynda bul sharany uıymdastyryp kelemin. Bıyl Astana qalasynyń Qoǵamdyq damý ister basqarmasy maǵan osy sharany uıymdastyrýǵa usynyspen kelip, qoldaý kórsetip otyr. Mundaı keshterdi ótkizýdegi maqsatym – jastardy qaıyrymdylyqqa úndep, kópshiliktiń kókeıindegi «qaıyrymdylyq jasaý úshin baı bolý kerek» degen ustanymdy joıý», deıdi Alpamys Shárimov.
Aıta keteıik, Astana qaıyrymdylyq Grand baly aıasynda balalar úıinde qaıyrymdylyq konsert, sheberlik synyptary jáne «Júrekten júrekke» aksııasy ótedi. Osy aksııa kezinde áleýmettik jaǵdaıy tómen 150 otbasyǵa tosynsyı jasalatyn bolady.
Qarlyǵash QURAMYS,
«Egemen Qazaqstan»