2018 jyldyń úzdik boksshysy chempıony Temirtas Júsipov Qazaqstan birinshiliginde jańa rekord ornatty. Ol elimizdiń bes dúrkin chempıony atanǵan jalǵyz boksshy dep jazady Olympic.kz.
Temirtastyń aıtýynsha, alǵashynda ol óziniń rekord ornatqanyna senbegen.
«Shyny kerek, bes dúrkin el chempıony atanǵanymdy bilgen joqpyn. Munyń rekord ekenin aıtqanda da senbegem. Degenmen, elimizde óz myqtylyǵymdy dáleldep júrgenim úshin qýanamyn. Maǵan jyldyń úzdik boksshysy ataǵyn beredi degen oı bolmaǵan. Kútpegen jaıt boldy men úshin. Qýanyshymda shek joq», - deıdi Temirtas.
Boksshynyń endigi armany – Olımpıada oıyndaryna qatysý. Ázirge, olımpıadalyq salmaq dárejeleriniń qalaı ózgeretini belgisiz.
«Árıne, óz salmaǵymda Olımpıada oıyndaryna qatysyp, júlde alsam ǵoı degen armanym bar. Bizdiń sportta salmaq dárejeleri ózgeredi degen sybys bar. Degenmen, bul týraly áli oılaǵan emespin. Salmaq dárejeleri qalaı ózgerse de, tórtjyldyq dodasyna qatysýǵa tyrysamyn», - deıdi sportshy.
Búginde bokstan Qazaqstan ulttyq quramasy qysqa merzimdi demalysta. Qańtar aıynan bastap komandanyń oqý-jattyǵý jıyndary bastalady.