Ol toıdan qaıtyp kele jatqan bolatyn. Árıne eptep qyzýlaý edi. Biraq... onyń ne sókettigi bar deısiz. Toı bolǵan soń, ondaǵy jurt: «Ish, je, toıyp al!» dep turady ǵoı.
Iá-á, solaı. Biraq onyń kóńili áldeneden sekem alyp kele jatty. Sebebi... Sebebi bul toı barsha musylman úmmeti qurmetteıtin qasıetti Qoja Ahmet Iаsaýı babamyzdyń súıegi jatqan kıeli Túrkistan qalasynda ótti emes pe.
Jo-joq. Bolmady. Bolmady bul... Ishpeýi kerek edi.
Onyń ústine, ol ornalasqan qonaqúı de qasıetti kesenege jaqyn eken. Sodan da bolar, alǵa basqan aıaǵy keıin ketip, ázer adymdap keledi. Aı jaryǵymen qaraýytyp kóringen kesene jaqqa qaraýǵa tipti júregi daýlamady.
Kenet onyń esine Aqan seriniń áıgili «Maıdaqońyry» oraldy. «Jigittiń padıshasy Ámir Temir,» dep shyrqamaýshy ma edi seri atamyz.
Iá-á... Iá, myna keseneni saldyryp, uly babamyzǵa máńgilik eskertkish ornatqan sol Ámir Temir ózine qarsy shyqqandardyń qanyn sýdaı aǵyzdy...
«Al onyń janynda... onyń janynda sharap degenińiz ne, táıiri?!» Kenet osy bir tentek oı onyń eńsesin tiktep, kóńiline qýat bitirgendeı kesene jaqqa kóz salyp edi, aı jaryǵymen qaraýytyp, sulbasy ǵana kóringen kesene buǵan qyryn qarap, tomsyraıyp tur eken.
Selk ete qaldy. О́z kóńilindegi jańa ǵana boı kótergen oı qamaly áp-sátte qırady.
«Aınalasyna bilim shyraǵyn jaǵyp, izgilik jolyna bastaǵan Qoja Ahmet Iаsaýı baba, jarty álemdi jaýlaǵan Ámir Temir jáne búgingi toı... qan tústi sharap...».
Ol óz oıynan ózi shatasa bastaǵanyn sezdi. Qonaqúıdiń tabaldyryǵynan ázer attap, ishke kirip bara jatyp: «Bul dúnıe óte kúrdeli, – dedi kúbirlep. – Tek bizdiń ol týraly túsinigimiz tym-tym qarapaıym...».
Nurǵalı ORAZ,
«Egemen Qazaqstan»