Qurlyqtyq hokkeı lıgasynyń (QHL) kezekti týr oıynyn óz muz aıdynynda ótkizgen «Barys» Vladıvostoktyń «Admıral» klýbynan aılasyn asyrdy.
Birinshi kezeńde «Barys Arenaǵa» jınalǵan 4 022 kórermen qaqpa torynan tabylǵan alty birdeı shaıbanyń kýási boldy. Alǵashqy eki goldy astanalyqtar soqty. 4-mınýtta Roman Starchenko mergendik tanytsa, 9-mınýtta Dastın Boıd esepti eseledi. Alaıda Qıyr Shyǵystan kelgen hokkeıshiler de ońaılyqpen berilmeıtinderin ańǵartyp, kózdi ashyp-jumǵansha qatarynan úsh márte nysanany dál kózdedi. Bul goldardyń avtorlary – Egor Iаkovlev, Denıs Vıharev jáne Karel Kýbat. Alǵashqy kezeńniń aıaqtalýyna bir mınýttaı ýaqyt qalǵanda Andre Petersson tarazy basyn teńestirdi. Úzilisten keıin qos komandanyń da qarqyny baıaýlap, tablodaǵy esep sol kúıinde qaldy. Al úshinshi kezeńde Mettıý Frettın soqqan shaıba «Barysqa» jeńis áperdi. Esep – 4:3.
Qazirgi kezde astanalyq hokkeıshiler QHL-dyń turaqty birinshiliginiń jarys kestesinde 8-oryndy ıelenýde. 40 kezdesýden keıin olar 56 upaı jıyp otyr. О́ziniń kelesi básekesin «Barys» 28-jeltoqsanda Chelıabide jergilikti «Traktorǵa» qarsy ótkizedi.
Ǵalym SÚLEIMEN,
«Egemen Qazaqstan»