Shymkent qalasyna qarasty №4 Saıram kómekshi mektep-ınternatynyń balalary úshin bul kún erekshe este qaldy. Sebebi aıtýly datada olar júrekterine jylýlyq alyp, qam kóńilderine meıirim uıalatty. Dál osy kúni jasóskinder Elbasy Nursultan Nazarbaev joldaǵan Quttyqtaý hat pen syıǵa tartqan otandyq sý jańa avtokólikke ıe boldy.
Memleket basshysynyń Alǵys haty men baǵaly syılyǵyn qala ákimi Ǵabıdolla Ábdirahymov tárbıelenýshiler men ujymǵa arnaıy baryp tabys etti. Balalar Prezıdenttiń ózderine arnap jazǵan hatyn erekshe yqylaspen tyńdap, Ult Kóshbasshysyna alǵys aıtty.
Esterińizge salar bolsaq, atalǵan balalar úıiniń tárbıelenýshileri 1-jeltoqsan Tuńǵysh Prezıdent kúni qarsańynda Eltutqamyz Nursultan Ábishulyna ujymdyq quttyqtaý men óz qoldarymen jasalǵan óner týyndylaryn joldaǵan bolatyn. Shymkenttik balalardyń haty men syılyǵyn qabyl alǵan Elbasy rızashylyǵyn bildirip, ystyq lebizin osylaısha jetkizgen edi.
Elbasy sálemdemesin ala kelgen qala ákimi Ǵabıdolla Ábdirahymov Saıram turǵyn alabyndaǵy balalar úıiniń jetkinshekterin Jańa jyl merekesimen quttyqtap, sporttyq kıimder syıǵa tartty. Ári olar daıyndaǵan konserttik baǵdarlamany tamashalady.
Atalǵan balalar úıinde 80 jasóspirim tárbıelenýde. Olardyń 26-sy tul jetim bolsa, 54-i ata-anasynyń qamqorlyǵynsyz qalǵan jandar. sondaı-aq munda týabitti kemistigi bar balalardy ónerge baýlyp, qoǵamǵa beıimdeıdi. 30 jyldan beri balalar bilim men tárbıe alyp jatqan bul ǵımarat 1916 jyly qurylǵan tarıhı nysan bolyp sanalady. Munda dál qazir 210 oqýshy tárbıelenip jatyr.
Nurshat TО́KEN,
«Egemen Qazaqstan»