Polıseıler men tótenshe jaǵdaı qyzmetiniń qutqarýshylary en dalada synyp qalǵan «Nıva-Shevrole» avtokóliginiń júrgizýshisi men jolaýshylaryna der kezinde kómek kórsetti.
Polısııa departamentiniń jedel josparlaý basqarmasy men Tótenshe jaǵdaılar departamentiniń kezekshi bólimine habarlama túsip, Aqjar aýdany aýmaǵynda júrginshilerdiń qıyndyqqa dýshar bolǵany jaıly aıtylǵan. Keıin anyqtalǵandaı 3 jolaýshysy bar «Nıva-Shevrole» kóligi oblys ortalyǵynan shalǵaıdaǵy aýdanǵa bet alyp, orta jolda tehnıkalyq aqaý shyqqan. Aralarynda jasy seksendi alqymdaǵan qarııa bolǵan. Olar qaı jerde turǵandaryn tap basyp aıta almaǵan.
Aqjar aýdany polısııa bóliminiń bastyǵy, polısııa podpolkovnıgi Marat Nurahmetovtyń basshylyǵymen 4 jedel-izdestirý toby qurylyp, iz kesedi. Tún qarańǵylyǵy, uıaly baılanystyń bolmaýy, eldi mekenderdiń alshaqtyǵy biraz qıyndyqtar týdyrady. Júrgizýshi tańǵa jaqyn Aqjarqyn aýylyna jetip, ornalasqan jeri týraly habarlaıdy. Osy sátte izdestirý toby oǵan tap bolyp, jolaýshylar eldi mekenge din aman-esen jetkiziledi.
Kómek ýaqytyly kelmegende teriskeıdiń sarshunaq aıazy men ókpek jeline jolaýshylardyń shydas berýi ekitalaı.
О́mir ESQALI,
«Egemen Qazaqstan»
Soltústik Qazaqstan oblysy