Áskerı qalashyqta ornalasqan №32 mektepte bilim alatyn balalardyń deni áskerılerdiń otbasynan. Osyǵan oraı bolashaqta elimizdiń qorǵanys kúshteri salasynda qyzmet etýdi armandaıtyn balalardyń da sany az emes. Otansúıgishtikti, jaýyngerlik rýhty tárbıeleý maqsatynda mektepte arnaıy jaýyngerlik eńbek dańqy mýzeıi de jasaqtalǵan.
Jýyrda osy mýzeıge áskerı áýe kúshteri bóliminiń ıdeologııa jáne arnaıy nasıhat boıynsha aǵa ofıseri Darhan Qusaıynov MI-26 tikushaq-trenajerin ákelgen-di. Balalardyń tańdanysyn, qyzyǵýshylyǵyn týǵyzǵan tikushaqpen tanysý úshin arnaıy kezdesý uıymdastyrylyp, mektepke kelgen ushqyshtar Aslan Rahymbaev jáne Maǵjan Erjanov áskerı tehnıkalar, ushaqtar men tikushaqtar týraly, áýede oqys qımyldarǵa daıyndyq, ushqysh bolý úshin qandaı erik-jiger, talaptardyń qajet ekendigi jaıynda óz tájirıbelerimen bólisti.
Mektep dırektory Aıda Hasenova osyndaı erekshe sabaq uıymdastyrýǵa yqpal etken Áýe qorǵanys kúshteri avıabazasynyń komandıri Nurlan Baıdýllaev pen Darhan Qusaıynovqa mektep ujymy atynan zor rızalyq bildirip, mektepterde áskerı sabaqtardyń jıi ótýi balalardyń boıynda otansúıgishtikti darytýǵa, erik-jigerdi shyńdaýǵa, erjúrek pen batyldyqqa tárbıeleýge múmkindik beretindigimen qatar ómirde kezdesetin qıyndyqtarǵa moıymaýǵa, jaýapkershilikti bolýǵa shaqyratynyn atap ótti.
Elvıra SERIKQYZY,
«Egemen Qazaqstan»
ALMATY