Syrtqy ister mınıstri Beıbit Atamqulov Túrki akademııasynyń prezıdenti, professor Darhan Qydyrálimen kezdesti jáne onyń barysynda taraptar Túrki akademııasy qyzmetiniń 2018 jylǵy qorytyndylaryn talqylap, bolashaqtaǵy yntymaqtastyqtyń perspektıvalyq baǵdarlaryn bekitti.
Taraptar 2019 jylda ótkizýge josparlanǵan Túrkitanýshylardyń dúnıejúzilik kongresine daıyndyq jumystarynyń barysyn talqyǵa saldy.
Suhbat barysynda aıtylǵandaı, barsha túrki álemine mańyzy zor oqıǵa bolatyn Túrkitanýshylardyń dúnıejúzilik kongresi dúnıejúzilik túrkitanýdyń qaıta órkendeýine jáne osy ǵylymnyń aǵymdaǵy kúıin, jetistikterin, máseleleri men perspektıvalaryn tereń saraptalyp, jańa kózqarastan ótkizýge úlken yqpal etýi tıis.
B.Atamqulov túrki yntymaqtastyǵynyń damýy jańa bir kezeńge ótkenin jáne Memleket basshysy túrki ıntegrasııasyna óte mańyzdy mán beretinin atap ótti. «Túrki halyqtarynyń arasynda baýyrlas qatynastardy nyǵaıtý men túrkitaný ǵylymyn túrki órkenıetiniń jetekshisi retinde damytý, sondaı-aq Prezıdent Nursultan Nazarbaevtyń «Uly dalanyń jeti qyry» atty baǵdarlamalyq maqalasynda bekitilgen qaǵıdattardy júzege asyrý qajettilikterin eskere kele, mınıstrlik osy máselelerge basa nazar aýdarady jáne josparlanǵan is-sharalardy uıymdastyrý men ótkizýde jan-jaqty qoldaý kórsetedi» dedi mınıstr.
D.Qydyráli Syrtqy ister mınıstrligi tarapynan Akademııa qyzmetine jasalǵan qoldaý úshin úlken alǵysyn bildirdi. Kezdesý sheńberinde ol 2019 jyldyń ortasynda IýNESKO shtab-páterinde (Parıj q.) Túrki akademııasyna múshe-memleketter ǵalymdarynyń qatysýymen ótetin «Uly dala: mádenı mura men dúnıejúzilik tarıhyndaǵy róli» atty is-shara jóninde aqparat berdi.