Arqanyń Betpaq degen dalasy bar, Betpaq - shól, oıly-qyrly panasy bar. Sol shólde el joq, kún joq ósip-óngen Jándiktiń kıik degen balasy bar. Betpaqta qysy-jazy el bolmaıdy, El-jaılaý, ózen ıakı kól bolmaıdy. Butasy qý baıalysh, qara jýsan, Kógala betegeli bel bolmaıdy. Betpaqtyń kóldeneńi segiz kóshtik, Saılanyp qys ishinde talaı kóshtik. Azamat, at pen aıǵyr, atan ǵana Shydar dep qosta otyryp, talaı destik. Betpaqta elsiz-kólsiz ósip-óngen, Jalǵyz-aq qulan, kıik shólge kóngen. Qazaqtyń maldaryndaı qybyrlasyp, Ár oıdan top-top bolyp jýsap órgen. Jalǵyz-aq el jylynda kóship óter, Asyǵyp qar sýymen "nesip eter". Qaptasyp, kóshken elmen damyl almaı, Mergender ań aýlasyp kásip eter. Mergender damyl almaı kıikti atqan, Aýyldy qan sasytyp topyrlatqan. Kıikti oılaı ma eken taýsylar dep, Azaıyp birte-birte kele jatqan!.. Betpaqtyń kókpek, jýsan, shóbi suıyq, Sol shópti qorek qylǵan baıǵus kıik. Tańy - appaq, eki kózi móldir qara, Tıgendeı emes adam kózi qıyp. Kıikti qazaq jáne deıdi bóken, Betpaqty bul beıshara qylǵan meken. Bókendi atyp mergen óltirgende, Jazasyz jan óldi dep oılaı ma eken? Bókennen sulý ańdy men kórmedim, О́zge ańǵa janýardy teń kórmedim. Kózderi móldiregen aqbókendi Adamnyń balasynan kem kórmedim. Qap-qara eki kózi móldiregen, Ádemi eki tanaý jelbiregen. Eleńdep jas balasha jaltańdaıdy, Jel túrtken jýsannan da seldiregen. Azaıdy sońǵy kezde baıǵus bóken, Myń-myńnan baıaǵyda óredi eken. Bul kúnde kele jatqan jolaýshyǵa, Kez keledi anda-sanda saıaq-neken. Keı qazaq ádet qylǵan kıik atyp, Múıizin paıda qylyp, shetke satyp. Sandalǵan bir kıikke ushyrastym, Bir jyly Betpaq shólde kele jatyp. Betpaqta kele jatty aqsaq kıik, Sandalyp qańǵyraqtap basyn ıip. Pana izdep shybyn janǵa súıretilip, Mergenniń keýdesine oǵy tıip. Tamady qara jerge aqqan qany, Qınalyp entigedi shybyn jany. Boıalyp aq denesi qyzyl qanǵa, Keledi áli ketip jyǵylǵaly. Qıyrsyz, Betpaq dala... qýraǵan shól... Jalǵyz-aq syrǵandaıdy qońyltaq jel. Meńireý... tiri jan joq... jyp-jylmaǵaı. El qaıda? El alysta - shýlaǵan el! Sandalyp kele jatty aqsaq kıik, Bir toqtap, anda-sanda álin jıyp... Aqbóken saharanyn bota kózi, Atty eken qandaı mergen kózi qıyp? Keledi qańǵylaqtap jalǵyz ózi, Tili joq, qur júrekte aıtar sózi. Shaǵady shybyn jannyń qınalǵanyn Jalǵyz-aq móldiregen eki kózi. Japanda esh saıa joq shybyn janǵa, Monshaqtap jerge tamǵan qyzyl qanǵa. Japanda basyn súıer tiri jan joq, Ál ketip sorly kıik jyǵylǵanda!.. Bota kóz saharada qyna tergen, Kim eken japan túzde seni kórgen? Aıanysh sezimi joq bir qazaq-aý, Dál kózdep júregińe atqan mergen!..