Aqtóbe – jyl saıyn qanatyn keńge jaıyp, tez ósip-órkendep kele jatqan qala. Shyraıly shaharda sońǵy ýaqytta sándi de sáýletti shaǵyn aýdandar men kórikti kósheler boı túzedi. Onyń bárine tıisti ataý berilýiniń de alatyn róli joǵary.
Osyǵan oraı sońǵy ýaqytta oblys boıynsha 292 kóshege ataýlar berilgen bolsa, onyń basym bóligi Aqtóbe qalasynyń úlesine tıedi. Buǵan deıin óńirde búgingi qazaqstandyq qoǵamnyń bitim-bolmysyna sáıkes kelmeıtin kóshe ataýlary da saqtalyp kelgeni belgili. Qazirgi kúni bul másele de óz sheshimin taýyp, 87 kósheniń ataýy qaıtadan ózgertildi.
Buǵan qosa ataý alýǵa kezegi kele qoımaǵan ataýsyz kósheler de Naýryz, Býrabaı, Ústirt, Aqberen, Jýsandy, Qus joly, Jeti qazyna, Saryarqa jáne Sulýtóbe sekildi halyqtyq salt-dástúrlerimizge saı ataýlarmen aıshyqtaldy. Sondaı-aq burynǵy otarshyldyq dáýir men keńestik totalıtarlyq júıe ókilderiniń esimderin ıelenip kelgen kósheler – Muhtar Áýezov, Máshhúr-Júsip Kópeıuly, Dına Nurpeıisova, Balýan Sholaq, Qasym han, Kereı han jáne Jánibek han atyndaǵy kósheler bolyp qaıta jańǵyrtyldy.
Aqtóbe oblystyq tilderdi damytý basqarmasynyń basshysy Gúlaıym Tólebaevanyń málimdeýinshe, óńirdegi onomastıka komıssııasy kóshelerge ataý berýge qatysty 176 usynysty talqylaýǵa salypty. Onyń 155-ne oń qorytyndy berilgen. Sondaı-aq 224 ataý respýblıkalyq onomastıkalyq komıssııanyń qoldaýyna ıe bolypty. Túptep kelgende, qazirgi kezde oblystyq toponomıka keńistigin qazaq tilindegi ataýlar úlesi 93 paıyzdy qurap otyr. Bul qalǵan jeti paıyzdyq mólsher búgingi qoǵam jáne ýaqyt talabymen sáıkespeıdi degen uǵymdy bildirmeıdi. О́ıtkeni eldik múddege birqatar orys tilindegi tulǵalardyń da qyzmet jasap kelgenin eshkim joqqa shyǵara almaıdy. Endeshe, olardyń ataýlary da respýblıka qalalaryndaǵy kósheden kórinis tabýy ádiletti bolmaq.
Temir QUSAIYN,
«Egemen Qazaqstan»
AQTО́BE