Kókshetaý qalasyndaǵy Nazarbaev Zııatkerlik mektebinde bilim alatyn oqýshylar arasynda qazaq tili men ádebıeti pániniń aptalyǵy ótýde. Aıtýly shara aıasynda oqýshylar halyqaralyq aqyn-jyrshylar jáne termeshiler Odaǵynyń múshesi, halyqaralyq «Shabyt» festıvaliniń dıplomanty Qýanysh Ospanovpen kezdesti. Basqosý barysynda aqyn óz shyǵarmashylyǵymen bólisip, oqýshylardyń suraqtaryna jaýap berdi. Avtorlyq óleńderi men ánderin oryndady.
Qýanysh Ospanov – kókshelik jas aqyndardyń kóshin bastap kele jatqan qalamger. Ol «Aýyldyń balasymyn», «Aspandaǵy astra» jyr jınaqtarynyń avtory. Aqyn mundaı kezdesýler jastardyń boıyna rýhanı qundylyqtardy sińirýge, ádebıetke, óleńge qumar oqýshylardyń talantyn ushtaýǵa septigin tıgizedi deıdi.
– Jastar men oqýshylar arasynda osyndaı kezdesýlerdi kóbirek uıymdastyrǵan durys. Mektep basshylyǵy men ustazdary tarapynan oqýshylarmen kezdesip ketseńiz qaıtedi degen usynys túsken kezde qýanyp kettim. Biz qazirgi kezde oqýshylardy kinálap jatamyz. Kitap oqymaıdy. Gadjette, ınternette otyrady degen sııaqty. Sondyqtan, menińshe osy rýhanı ortada júrgen adamdarmen kezdesý ótkizip turý jaqsy úrdis dep oılaımyn,–deıdi aqyn Qýanysh Ospan.
Jastar jylyndaǵy jaqsy sharýaǵa olardyń ózderi de dán razy. Ásirese, jyr otynan jylynǵandary anyq baıqalyp tur.
– Men búgingi kezdesýden jaqsy áser aldym. Qýanysh aǵamyzdyń shyǵarmashylyǵymen tanystyq, el bilmeıtin qyrlaryn tanydyq. Ásirese, «Janaıqaı» degen óleńin tyńdaǵanda qoǵamda bolyp jatqan kóptegen máseleler qozǵalǵan. Aqyn aǵaı bizge sabaq bolatyn nasıhattaryn aıtyp, ómirlik tájirıbesimen bólisti,– Kókshetaý qalasyndaǵy Nazarbaev zııatkerlik mektebiniń oqýshysy Tólebı Tóleshev.
Elbasy Nursultan Nazarbaev jastar tárbıesine asa mán berip, bıylǵy jyldy jastar jyly dep belgilep otyr. Jastardy mektep tabaldyryǵynan bastap tárbıeleý asa qajet.
Baıqal BAIÁDIL,
«Egemen Qazaqstan»
Kókshetaý qalasy