Búgin QR Úkimetiniń baspasóz ortalyǵynda ótken brıfıngte ındýstrııa jáne ınfraqurylymdyq damý mınıstri Jeńis Qasymbek shıkizattyq emes eksportty ilgeriletý boıynsha qabyldanyp jatqan sharalar men ekonomıkanyń ónerkásiptik sektoryn sıfrlandyrý barysy týraly aıtyp berdi. Bul týraly Premer-Mınıstrdiń baspasóz qyzmeti habarlady.
Indýstrııa jáne ınfraqurylymdyq damý mınıstrligi Memleket basshysynyń tapsyrmalaryn iske asyrý boıynsha, sondaı-aq ındýstrııalandyrý men «Nurly jer», «Nurly jol» baǵdarlamalary aıasynda júıeli jumystar júrgizip jatyr.
J. Qasymbek negizgi metaldarǵa qatysty álemdik baǵanyń tómendeýine, negizgi saýda áriptesterine qatysty sanksııalarǵa jáne basqa da syrtqy faktorlarǵa qaramastan, 2018 jyldyń qorytyndysy boıynsha ónerkásip 4,1%-ke óskenin aıtty. Bul taý-ken sektorynyń 4,6%-ǵa jáne óńdeýshi ónerkásiptiń 4%-ǵa ozyq qarqynmen ósýi esebinen oryndaldy. Negizgi draıverler — mashına jasaý, hımııa ónerkásibi, munaı óńdeý, jeńil ónerkásip jáne munaı men gaz óndirý salalary.
«2018 jyldyń qorytyndysy boıynsha óńdeýshi ónerkásipte jumys istep turǵan kásiporyndardyń sany 14,7 myńǵa jetti. Jalpy alǵanda ónerkásip boıynsha eńbek ónimdiligi 3,5%-ǵa, negizgi kapıtaldaǵy ınvestısııalar – 27%-ǵa ósti», — dedi mınıstr.
Indýstrııalandyrý baǵdarlamasyn iske asyrý kezeńinde jalpy quny 7,9 trln teńge bolatyn 1250-den astam joba iske qosylyp, 120 myń turaqty jumys orny quryldy. Al, 2018 jyly quny 1,3 trln teńge bolatyn 100 jańa joba iske qosylyp, 13 myńnan astam turaqty jumys orny quryldy.
2019 jyly jalpy somasy 1,1 trln teńge bolatyn 120-ǵa jýyq kásiporyndy iske qosý josparlanyp otyr. Bul jobalar boıynsha 20 myń turaqty jumys orny qurylady.
Shıkizattyq emes eksportty ilgeriletý boıynsha qabyldanǵan sharalardyń arqasynda 2018 jyldyń 11 aıynyń qorytyndysy boıynsha eksport kólemi 24%-ǵa ósip, $54,7 mlrd qurady, onyń ishinde óńdelgen ónimder eksporty $14,3 mlrd jetti. 2018 jyly qazaqstandyq ónim 119 elge eksporttaldy.
Aldaǵy úsh jylda (2019–2021 jj.) salaǵa qosymsha 500 mlrd teńge bólinip, bul shıkizattyq emes eksportty damytýǵa jańa serpin beredi. Bul 2021 jylǵa qaraı óńdeýshi ónerkásip ónimderiniń eksportyn 720 mlrd teńgege deıin, eksporttaýshylar sanyn 411-den 600 sýbektige deıin arttyrýǵa múmkindik beredi.
«Sıfrlyq Qazaqstan» memlekettik baǵdarlamasy aıasynda 2022 jylǵa qaraı óńdeý ónerkásibi men taý-ken metallýrgııa kesheniniń (TKMK) 100-den astam kásipornynda ınnovasııalyq jáne sıfrlyq tehnologııalardy engizý kózdelgen.
«Bıyl TKMK, hımııa, qurylys jáne azyq-túlik salasynyń 32 kásipornynda ınnovasııalyq jáne sıfrlyq tehnologııalardy engizýge qatysty 38 joba iske asyrylady», — dedi J. Qasymbek.
О́tken jyly Indýstrııalyq damýdyń úshinshi baǵdarlamasyn ázirleý jumystary bastaldy. Mınıstrdiń aıtýynsha, jańa ındýstrııalyq saıasat 2025 jylǵa qaraı óńdeý ónerkásibinde (2016 jylǵy deńgeımen salystyrǵanda): eńbek ónimdiliginiń naqty ósimi — 1,7 ese, shıkizattyq emes eksporttyń qundyq kóleminiń ósimi — 2,3 ese, óńdeý ónerkásibiniń negizgi kapıtalyna salynǵan ınvestısııalardyń naqty ósimi — 2 ese.