Álemde tuńǵysh ret symsyz mehanıkalyq júrek (FIVAD) ornatý operasııasyn elimizdiń kardıohırýrgteri Chehııa, Izraıl, Italııa jáne AQSh-taǵy seriktesterimen birlesip sátti oryndady. Bul jańashyldyq týraly Astanadaǵy Ortalyq kommýnıkasııalar qyzmetinde ótken baspasóz máslıhatynda aıtyldy.
Júrektiń sol jaq qarynshasynyń kómekshi qurylǵysy 24 jastaǵy almatylyq Ismaıl Tursynovtyń júregine 2018 jyldyń 15 jeltoqsanynda ornatylǵan. FIVAD-tyń ereksheligi, syrtqa eshqandaı symdardyń shyǵyp turmaıtyndyǵynda. Bul pasıent aǵzasynda asqynýlardy boldyrmaıdy, naýqas emin-erkin saý adamdardaı qımyldaı alady. Apparattyń batareıasy keýdeniń ishinde ornatylǵan. Ony arnaıy belbeý arqyly magnıttik tolqynmen zarıadtaıdy. Al arnaıy qolsaǵat júrektiń soǵýyn, qannyń qysymyn jáne taǵy basqa málimetterdi kórsetip turady. «Buryn deneden sym shyǵatyn jerde bakterııalar jınalatyn, ony únemi emdep otyrý qajet edi. Al jańa qurylǵyda ondaı symdar joq. Úlken sómkeni birge alyp júrýdiń qajeti de shamaly», dedi Londonnan kelgen doktor Mendıp Mexra.
Sýrette Ismaıl Tursynov
Halyqaralyq statıstıkalyq málimetterge sáıkes, álemde 26 mıllıon adam sozylmaly júrek jetkiliksizdigi syrqatynan zardap shegedi eken. Bul sanatqa jyl saıyn 900 myńǵa jýyq jańa naýqas qosylyp otyratyn kórinedi. Al olardyń 800 myńǵa jýyǵy júrek transplantasııasyn qajet etedi. Biraq bes jylda donoryn kútpesten qaıtys bolatyndardyń sany 7% -dan 50%-ǵa deıin jetedi eken. «Mehanıkalyq júrekti qoldaýdy damytý belsendi túrde damyp keledi. Innovasııalyq qurylǵyny ornatý operasııasy álemdik kardıohırýrgııa tájirıbesinde tuńǵysh ret júzege asyp otyr. Bul Qazaqstannyń áleýeti jetkilikti, ǵylym men tehnıkasy damyǵan el ekenin kórsetedi. Men Ismaıl Tursynovty tuńǵysh ǵaryshkerge teńeımin. Ol aýrýhanaǵa túskende óz bólmesinen shyǵa almaıtyn, qatty demikpesi bar edi. Únemi dárigerlerdiń baqylaýynda boldy. Qazir jaǵdaıy jaqsy, dalada serýendeıdi, sport zalda jattyǵady, tipti, basseınge de túse alady», dedi «Ulttyq ǵylymı kardıohırýrgııa ortalyǵy» AQ Basqarma tóraǵasy Iýrıı Pıa.
Bas kardıohırýrgtiń aıtýynsha, jylyna 150-ge jýyq naýqas osyndaı operasııany qajet etedi. Innovasııalyq qurylǵy Izraılde jasalǵan. Aldaǵy ýaqytta FIVAD-qa eýropalyq sertıfıkat alyp, Eýropada jáne Amerıkada eksperıment júrgizilmek. Sodan keıin ony tegin medısınalyq kómektiń sanatyna qosyp, qazaqstandyqtarǵa tegin ornatýǵa múmkindik týatyn bolady.
Baspasóz máslıhatyna Ismaıl Tursynovtyń ózi de qatysty. Búginde emin-erkin qozǵalatyn emdelýshiniń tósekke tańylǵan qıyn kúnderi artta qaldy. Jýrnalısterge bergen suhbatynda ol ózin jaqsy sezinetinin, salmaǵynyń 94 keliden 67 kelige túskenin aıtty. Soǵan qaramastan Ismaıl dárigerlerdiń baqylaýynda bolady.
«Prezıdent Nursultan Nazarbaevtyń basty maqsaty – Qazaqstan halqynyń ómir súrý sapasyn jaqsartý jáne básekege qabiletti 30 eldiń qataryna kirý. Osy maqsatqa jetýdiń bir joly – densaýlyq saqtaý salasyna ınvestısııa salý. 2009 jyly qurylǵan Ulttyq kardıohırýrgııa ortalyǵy búginde álemdegi eń myqty kardıohırýrgııalyq ortalyqtardyń birine aınaldy. Aldaǵy ýaqytta da bul ortalyq ǵylymı-saıası seriktesterimen birlesip qazaqstandyqtardyń ıgiligi úshin sapaly qyzmet etedi dep senemin», dedi brıfıngte Densaýlyq saqtaý mınıstri Eljan Birtanov.
Maıgúl SULTAN,
«Egemen Qazaqstan»
Foto: ortcom.kz