Batys Qazaqstan oblystyq Qoǵamdyq keńestiń otyrysynda óńir basshysy Altaı Kólginov, oblystyq máslıhat hatshysy Málik Qulshar jáne oblystyq Qoǵamdyq keńes tóraǵasy Erbol Salyqov ótken jyly atqarylǵan jumystardyń esebin berdi.
Batys Qazaqstan oblystyq Qoǵamdyq keńes tóraǵasy Erbol Salyqovtyń aıtýynsha, 2016 jyly aqpan aıynda 41 adamnan qurylǵan Qoǵamdyq keńes músheleriniń naqty sany qazir 38 adamǵa turaqtaǵan, onyń 31-i – azamattyq qoǵam ókilderi eken. Qoǵamdyq keńes qurylǵaly beri ótken úsh jyl ishinde 23 márte keńeıtilgen otyrys, 60 márte tóralqa otyrysy ótken. Batys Qazaqstan oblysynyń Zelenov aýdanynyń ataýy Prezıdent Jarlyǵymen Báıterek bolyp ózgerýi, ózge de eldimekender men kósheler ataýyn aýystyrý aldymen osy Qoǵamdyq keńes otyrystarynda qaralǵan. Keńes qurylǵan alǵashqy jyly búkil qoǵamdy alańdatqan jer máselesine oraı 2016 jyly Batys Qazaqstan oblystyq Qoǵamdyq keńesiniń keńeıtilgen otyrysy bir aıda 5 ret uıymdastyrylǵan. Bul jıynǵa 500-den asa adam qatysyp, 126 adam sóılegen. Osynyń ózi-aq Qoǵamdyq keńestiń el-jurt aldynda bedeldi, senimdi alańǵa aınalǵanyn kórsetedi. Tek 2018 jyly ǵana Qoǵamdyq keńestiń 7 otyrysy ótkizilip, 125 quqyqtyq-normatıvtik aktiler qaralǵan.
- Elbasynyń «Ult jospary – bes ınstıtýsıonaldyq reformany júzege asyrý jónindegi 100 naqty qadam» baǵdarlamasynan bastaý alǵan Qoǵamdyq keńester qurylǵaly beri ótken úsh jyl ishinde bılik pen halyq arasyndaǵy pikir almasý alańyna aınaldy, - deıdi Batys Qazaqstan oblystyq máslıhat hatshysy Málik Qulshar.
Jıynda óńirdiń áleýmettik-ekonomıkalyq damýy boıynsha atqarylǵan jumystar men 2019 jyldyń damý jospary týraly baıandaǵan Batys Qazaqstan oblysynyń ákimi Altaı Kólginov el ıgiligi, qoǵam jarasymy úshin aqysyz-pulsyz kóp jumys atqaryp júrgen Qoǵamdyq keńes múshelerine úlken alǵys aıtty.
- 2018 jyldyń qorytyndysy boıynsha óńirdegi ónerkásip kólemi 2,5 trln. teńgeni qurady. О́ńdeýshi ónerkásiptiń eksporty 202 mln. AQSh dollar, ınvestısııa kólemi 453 mlrd. teńge boldy. Shıkizattyq emes sektordaǵy ınvestısııa 11,4%-ke ósti, sonyń ishinde aýyl sharýashylyq salasyndaǵy ınvestısııalar 42%-ten joǵary boldy. Memleket bıýdjetine 304 mlrd. teńge mólsherinde salyq tústi. JIО́ qurylymynda shaǵyn jáne orta bıznestiń úlesi 40%-dan asady. 2018 jyly 432 myń. sharshy metr turǵyn úı salyndy. Osynyń bári, qurmetti keńes músheleri, ózderińizdiń tikeleı aralasýyńyzben júzege asty, - dedi Altaı Kólginov.
Oblys ákimi memlekettik baǵdarlamalar men Qazaqstan halqyna Joldaýyna sáıkes júzege asyrylǵan sharalardy da atap ótti.
Batys Qazaqstan oblysy ekonomıkasynyń arqasúıeri – munaı-gaz salasy ekendigi belgili. Biraq sońǵy jyldary ekonomıkany ártaraptandyrý júıeli qolǵa alyndy. Sonyń ishinde óńirdiń aýyl sharýashylyq áleýeti ósip keledi. Máselen 2018 jyly aýyl sharýashylyǵynyń jalpy ónimi 140 mlrd. teńgeden astam boldy. Sonyń ishinde tórt túliktiń de sany artqan: iri qara - 3,7% (565,6 myń bas), jylqy - 9,4% (180,6 myń bas), qoı - 0,6% (1 082,4 myń bas), qus - 39,3% (1 859 , 4 myń bas)-qa kóbeıgen. Asyl tuqymdy mal sany 35%-ǵa artqan. Sońǵy 4 jylda asyl tuqymdy mal ósirýmen aınalysatyn sharýashylyqtardyń sany da eki ese ósti.
- Mal basynyń ósýi et eksportyn ulǵaıtýǵa múmkindik berdi. Búgin biz et pen et ónimderin Reseı, Iran, Qytaı, Armenııa, Belorýssııa jáne basqa elderge jetkizemiz. 2017 jylmen salystyrǵanda et eksporty 34 paıyzǵa kóbeıdi nemese 3 myń tonnaǵa artty, - deıdi óńir basshysy.
Byltyr óńirde aýyl sharýashylyq ónimderin qaıta óńdeıtin 4 kásiporyn iske qosyldy. Sýarmaly alqap kólemi 43,8 myń gektarǵa jetti. Sońǵy 4 jyldyń ózinde 8 iri ırrıgasııalyq nysan qalpyna keltirilgen. Oblys ákimi osy sýlandyrý júıesine respýblıkalyq bıýdjetten qarjy kózin qarastyrýǵa qolǵabys etken osy óńirden shyqqan Paolament depýtattaryna alǵys aıtty.
- О́tken jyly Aq Jaıyq óńiri kóptegen áleýmettik-ekonomıkalyq damý kórsetkishine qol jetkizdi. Bul barlyq memlekettik organdardyń jáne azamattyq qoǵam ókilderiniń birlesip atqarǵan jumystarynyń nátıjesi. Biz bul jumyspen toqtap qalmaı, aldymyzda turǵan zor mindetterdi jumyla atqarýǵa tıispiz. Halqymyzdyń ál-aýqatyn jaqsartýǵa baǵyttalǵan «Nurly jol», «Nurly jer», «7-20-25» memlekettik jáne basqa da salalyq baǵdarlamalardy sátti júzege asyrýymyz kerek. Bul tapsyrmalar Elbasynyń Joldaýynda naqty aıqyndalǵan. Sondyqtan barshańyzdy elimizdiń básekege qabiletti 30 memleket qataryna kirýine, oblysymyzdyń odan ári kórkeıýine úles qosýǵa shaqyramyn, - dep qorytty Altaı Kólginov óz esebin.
Qazbek QUTTYMURATULY,
«Egemen Qazaqstan»
Batys Qazaqstan