Qaraǵandy oblystyq N.Gogol atyndaǵy ámbebap ǵylymı kitaphananyń «Amerıkandyq buryshynda» «NASA» astronomııa áýesqaılary klýbynyń alǵashqy kezdesýi ótti.
Kitaphananyń akt zalyna lyq tolǵan áýesqoılar aldynda kezdesýdiń moderatory Damır Kárimov astronomııalyq birlikter, meteorıtter men meteorlar arasyndaǵy aıyrmashylyqtar týraly, Sırıýstyń ereksheligi jáne ǵarysh álemine qatysty basqa da tartymdy taqyryptar boıynsha qyzyqty vıktorına uıymdastyrdy. Suraq-jaýap oıyny barysynda bilimpazdyǵymen kózge túsken jastarǵa estelik syılyqtar tabys etildi.
Sonymen qatar, Damır Kárimov teleskop tańdaý kezinde eskeretin birneshe jaıt týraly keńes berdi.
– Kóp adam teleskop uzyn bolsa, soǵurlym juldyzdardy jaqyndatyp kórsetedi dep oılaıdy. Múlde olaı emes. Shyndyǵyna kelgende, másele – teleskoptyń lınzasynda. Mysaly, fızıkada mynadaı erekshelik bar: lınzanyń dıametri úlken bolǵan saıyn, ol jaryqty kóbirek jutady. Eger salystyrar bolsaq, adam kóziniń qarashyǵy 10 mm bolsa, onda ol 5 myńǵa jýyq juldyzdy kóre alady. Al teleskoptyń dıametri 200 mm bolatyn lınzasynyń kómegimen mıllıonnyń shamasyndaǵy ǵarysh denelerin tamashalaýǵa bolady, – deıdi ol.
Kezdesýge qatysýshylar astronomııa jáne fızıka ǵylymdary týraly kirispe dáris tyńdaǵannan keıin, túrli teleskoptardy tamashalap, olardy is júzinde salystyrý múmkindigine ıe boldy.
Sharany uıymdastyrýshylar qaraǵandylyq órenderdiń ǵarysh álemi men oǵan qatysty dúnıelerge degen qyzyǵýshylyqtarynyń kúnnen kúnge artyp kele jatqanyn aıtady. Atalǵan sharany uıymdastyrýshylardyń biri, «American corner» úılestirýshisiniń kómekshisi Shuǵyla Saǵynbekova aldaǵy ýaqytta mundaı kezdesýlerdi aıyna eki ret ótkizip turý josparlanǵanyn málim etti.
Qaırat ÁBILDA,
«Egemen Qazaqstan»
Qaraǵandy