Keńes áskerleriniń Aýǵanstannan shyǵarylǵanyna 30 jyl tolýyna arnaldy. «Batys» óńirlik qolbasshylyǵy áskerı bóliminiń komandırleri Keńes áskerleriniń Aýǵan elinen shyǵarylǵanyna 30 jyl tolýyn aýqymdy baǵdarlamamen qarsy alyp, «Sarbazdar botqasynan» dám tatyp, saltanatty mıtıngter men eske alý keshterin ótkizdi.
Aqtaý, Aqtóbe jáne Atyraý garnızonyń áskerı qyzmetshileri Aýǵan soǵysynda qaza bolǵandardyń eskertkishterine gúl shoqtaryn qoıý rásimderi men saltanatty mıtıngterge qatysty.
Beıneýdegi saltanatty is-sharalardyń aıaqtalýymen Aýǵan soǵysynyń 25 ardageri 99116 áskerı bóliminiń «Beket Ata» oqý polıgonyna bet buryp, áskerı bólimniń ómirlik tynysymen tanysty, sarbazdarmen suhbat jasap, áskerı ashanadan aýyz tıdi.
Al, Aqtóbe qalasynda ornalasqan S.Jıenbaev atyndaǵy kitaphanada ınternasıonalıst jaýyngerler 30238 áskerı bóliminiń sarbazdary men № 16 orta mekteptiń «Búrkit» áskerı-patrıottyq klýbynyń tálimgerlerimen kezdesý ótkizdi. Ardagerler olarǵa ózderiniń jaýyngerlik joly týraly, soǵys qıyndyqtary men erlik, batyldyq úlgileri týraly áńgime aıtyp berdi.
Qazirgi tańda Qazaqstan Respýblıkasynyń Qarýly Kúshterinde sol surapyl soǵystyń kýágeri bolǵan biraz áskerı qyzmetshiler qyzmet etýde, olardyń basym bóligi basshylyq quramynda.
Gúlaıym ShYNTEMIRQYZY,
«Egemen Qazagstan»
Mańǵystaý oblysy