Oblysta ótken jyldardaǵy kóktemgi qarǵyn sýdyń zardabyn muqııat eskere otyryp, sý júrýi yqtımal eldi mekenderdi qaýipsizdendirý maqsatynda keshendi jospar jasaldy. Oblystyń 12 aýdanyndaǵy 43 eldi mekende joǵarydaǵy jospardy júzege asyrý jumystary tyńǵylyqty qolǵa alynyp otyr.
Qarǵyn sý kidirissiz ótýi úshin ózen ańǵarlarymen sabaqtasyp jatqan 10,2 shaqyrym sý ótetin jyralar tereńdetilip, eni keńeıtilýde. Ádette muz seńderi kepteletin ózenderdiń jaǵasyndaǵy bógetterdiń 9,3 shaqyrymy bıiktetilip, nyǵaıtylýda.
Tótenshe jaǵdaılar departamentine sý tasqynynyń aldyn alý sharalaryn tyńǵylyqty ótkizý úshin oblystyq bıýdjetten 51 mıllıon teńge qarajat qarastyrylǵan. Bul qarjy oblys aýmaǵynyń ústinen ushyp baqylaýǵa, ǵarysh arqyly monıtorıng júrgizýge jáne ózen-kólderdiń alqymyna keptelgen seńdi jarýǵa jumsalady. Aımaqta aıtyp kelmeıtin apattyń aldyn alýǵa 149,8 tonna janar-jaǵarmaı, 5,2 myń tonna ınertti materıaldar, 33,4 myń qapqa salynǵan qatty zattar daıyndalǵan. Bul baǵyttaǵy jumys qar kóbesi sógilgenshe jalǵaspaq.
Oblystyń eldi mekenderinen 110 myń tekshe metr qar shyǵaryldy. Qaýiptiń betin qaıtarýǵa 2462 adam, 1321 arnaıy tehnıka daıyn tur. Oǵan qosa, 131 sý aıdaıtyn, 45 sý ústinde júzetin qurylǵylar bar.
Baıqal BAIÁDIL,
«Egemen Qazaqstan»
Aqmola oblysy