Elbasynyń Jarlyǵymen bıylǵy jyldyń «Jastar jyly» dep jarııalanǵany belgili. Týrızm salasyndaǵy jastardyń úlesin arttyrý maqsatynda Jambyl oblystyq týrızm basqarmasynyń uıymdastyrýymen Taraz qalasynda alǵash ret «Taraz jerine taǵzym» atty jas týrıster festıvali ótti. Úsh kúnge sozylǵan týrızm festıvaline Jambyl, Almaty jáne Túrkistan oblystarynan, sondaı-aq, Almaty, Shymkent qalalarynan 14-18 jas aralyǵyndaǵy 800-ge jýyq oqýshy qatysty.
Festıvaldiń alǵashqy kúni kelýshilerge arnaıy ekskýrsııalyq týr uıymdastyryldy. Atalǵan shara oblys ortalyǵyndaǵy «Kóne Taraz» tarıhı-mádenı kesheninen bastaý alyp, qatysýshylar eki myń jyldyq tarıhy bar kóne Taraz qalasynyń tarıhymen tanysty. Budan keıin Áýlıeata jerine arnaıy kelgen ozat oqýshylar saıahat barysynda Qarahan, Tekturmas, Dáýitbek kesenelerimen qatar, «Qazaq handyǵyna 550 jyl» eskertkishimen jáne qaıta jańǵyrǵan «Jeńis» saıabaǵynda da boldy. Festıvaldiń bir ereksheligi, oqýshylar úshin ár nysan basynda vıktorınalyq oıyndar uıymdastyrylyp, jeńimpazdarǵa arnaıy syılyqtar tabystaldy.
Al, «Taraz jerine taǵzym» jastar festıvaliniń úshinshi kúni «Dostyq» úıindegi ǵylymı-tájirıbelik konferensııamen jalǵasty. Munda tarıhshylar men týrıstik kompanııa ókilderi qatysýshylar tarapynan qoıylǵan suraqtarǵa naqty jaýap berdi. Sonymen qatar, jastar týrızmin damytý máseleleri jóninde de sóz boldy.
Festıvaldiń qorytyndy bóliminde oqýshylar arasynda sýret jáne qolóner jumystarynyń kórmesi uıymdastyrylyp, «Jas sýretshi», «Jas usta» saıystarynyń da qorytyndysy shyǵaryldy. Jeńimpazdar arnaıy dıplom men baǵaly syılyqtarǵa ıe boldy. «Sharanyń maqsaty – Elbasynyń 2019 jyldy «Jastar jyly» dep jarııalaýyna oraı, aldymen týrızm salasyndaǵy jastardyń úlesin arttyrý. Jastar týrızmin damytý jáne olarǵa elimiz ben óńirdiń bul saladaǵy áleýetin tanytý ári aqparattandyrý. Balalar men jastardyń patrıottyq sezimin tárbıeleý. Sonymen qatar, týrıstik-ólketaný jumystaryn jandandyrý arqyly salaýatty ómir saltyn nasıhattaý», deıdi Jambyl oblystyq týrızm basqarmasynyń basshysy Qarlyǵash Aralbekova.
Hamıt Esaman,
«Egemen Qazagstan»
Jambyl oblysy