Astanada «Nur Otan» partııasynyń kezekti XVIII seziniń qarsańynda aımaqtardan jınalǵan partııa múshelerine arnalǵan taqyryptyq sessııalar ótti. Qazirgi ýaqytta elimizdiń eń iri saıası uıymynyń barlyq óńirlerde 1 mln-nan astam azamattyń basyn qosatyn 247 fılıaly jáne 5600 bastaýysh partııa uıymdary jumys isteıdi.
Sońǵy jyldary ǵana onyń nátıjesi boıynsha partııaǵa 140 myń ótinish túsken. Bul – partııanyń 20 jyldyq tynymsyz eńbeginiń jemisi. Sondyqtan saıası uıymnyń 2030 jylǵa deıingi baǵdarlamasynda Memleket basshysy, «Nur Otan» partııasynyń Tóraǵasy Nursultan Nazarbaevtyń tapsyrmalary men memlekettik mańyzdy baǵdarlamalardy júzege asyrýdaǵy partııanyń róli naqty kórsetilgen.
Sezd qarsańyndaǵy bes sessııanyń biri Nazarbaev Ýnıversıtette «Bilim sapasyn, azamattardyń áleýmettik qorǵalý deńgeıin arttyrý, jastardy qoldaý» taqyrybymen ótti. Bul jıyndy «Nur Otan» partııasynyń hatshysy Farhad Qýanǵanov júrgizip otyrdy.
Is-sharada baıandama jasaǵan Bilim jáne ǵylym, Aqparat jáne qoǵamdyq damý mınıstrlikteriniń ókilderi Elbasy tapsyrmalarynyń jáne memlekettik baǵdarlamalardy oryndaýdaǵy «Nur Otan» partııasynyń róline baılanysty málimetterimen bólisti. Sondaı-aq Eńbek jáne halyqty áleýmettik qorǵaý mınıstrliginiń ókili memlekettiń áleýmettik saıasatynyń negizderi boıynsha baıandama jasady.
Al «Deni saý adamdardyń myqty ultyn qalyptastyrý» atty sessııada Elbasy Joldaýyndaǵy tapsyrmalardy oryndaý sharalary, elimizdegi medısına deńgeıin kóterýge baǵyttalǵan jumystar talqylanyp, qoǵamdyq densaýlyqty nyǵaıtý, mindetti áleýmettik-medısınalyq saqtandyrý jobalarynyń júzege asýy týraly aıtyldy.
Otyrysqa Densaýlyq saqtaý mınıstri Eljan Birtanov, Májilis depýtattary, Mádenıet jáne sport mınıstrligi, «Ulttyq ǵylymı kardıohırýrgııa ortalyǵy» basshylary qatysty.
Eljan Birtanov densaýlyq saqtaý salasyn sıfrlandyrý maqsatynda medısına uıymdaryn aqparattyq júıelermen qamtý jumystary júrgizilip jatqanynan habardar etti. Osy maqsatta emhanalarda qujattamalardy elektrondy formatqa kóshirý jolǵa qoıylǵan.
Sonymen qatar mınıstrlikke dárigerlerdiń júktemesin azaıtý úshin jańa ýchaskeler ashý mindettelgen.
– Elimizde 15 medısına ýnıversıteti bar. Jyl saıyn ýnıversıtetterdiń myńdaǵan túlegi dárigerler qataryn tolyqtyryp otyrady. Alaıda aýrýhanalardaǵy kezek azaıar emes. Halyq únemi tolassyz kezekke shaǵymdanady.
Bul – dárigerlerdiń júktemesiniń kóptiginiń dáleli. Prezıdent tapsyrmasymen júıeli sharalar qamtylǵan keshendi jospar ázirledik. Osy oraıda dáriger júktemesin azaıtýǵa negizdelgen jańa júıe qolǵa alyndy. Byltyr 2000 jańa ýchaske ashyp, kezekti azaıtýǵa múmkindik aldyq. Negizgi mejemiz – 2700 ýchaske ashý, – dedi E.Birtanov.
Jıyn barysynda taýarlar men qyzmetterdiń sapasyn baqylaıtyn komıtet qurylatyny málim boldy.
Prezıdent janyndaǵy Memlekettik basqarý akademııasynda ótken «Jańa úlgidegi memlekettik apparatty qalyptastyrý jáne memlekettik qyzmetterdi avtomattandyrý» taqyrybyndaǵy sessııada Memleket basshysynyń qatysýymen ótetin «Nur Otan» partııasynyń HVIII sezinde qozǵalatyn, partııanyń
«Azamattardyń múddesi úshin memlekettiń tıimdiligin arttyrý» jobasy aıasynda memlekettik qyzmet kórsetýdi reformalaý men jańǵyrtýdyń ózekti máseleleri talqylandy.
Jıynǵa memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov, Indýstrııa jáne ınfraqurylymdyq damý mınıstrligi, Jambyl, Batys Qazaqstan oblystarynan kelgen 150-ge jýyq delegat qatysty. Jıyndy ashqan Májilis depýtaty, partııanyń «Memlekettik qyzmet kórsetý» baǵyty boıynsha partııalyq kýratory Maıra Aısına «Nur Otan» partııasynyń 20 jyldyq mereıli merekesimen quttyqtady.
– Búginde «Nur Otan» partııasy elimizdiń jetekshi partııasyna aınaldy.Partııanyń aımaqtarda 240 fılıaly qarqyndy jumys istep jatyr. Sezd qarsańynda sizdermen birge memlekettik apparatty qalyptastyrý jáne memlekettik qyzmetterdi avtomattandyrý máselelerin talqylaý úshin jınalyp otyrmyz, – dedi ol.
О́z kezeginde sóz alǵan Indýstrııa jáne ınfraqurylymdyq damý mınıstriniń orynbasary Qaıyrbek О́skenbaev búginde respýblıka boıynsha 487 myń adam páter kezeginde turǵanyn atap ótti.
– Olardyń turǵyn úı máselesin tolyq sheshý úshin 4 trıllıon 887 mıllıard teńge kerek. Ol úılerge ınfraqurylymdar júıesin júrgizýge qomaqty qarajat qajet, – dedi vıse-mınıstr.
Qatysýshylar memlekettik basqarýdyń tıimdi júıesin qalyptastyrýdaǵy partııanyń atqaratyn aıryqsha rólin atap ótti. Sondaı-aq ókiletti memlekettik organdardyń basshylary partııanyń jańa baǵdarlamasynyń jobasynda kórsetilgen maqsattaryn iske asyrý, júrgizilip jatqan jumystardy jetildirý boıynsha óz usynystarymen bólisti.
«Memleket basshysy Joldaýynda, bes áleýmettik bastamada atap ótken jáne «Nur Otan» partııasynyń 2030 jylǵa deıingi baǵdarlamasynda kózdelgen tapsyrmalardy iske asyrý aıasynda ekonomıkalyq ósimniń jańa úlgisin qalyptastyrý, halyqtyń kiristerin jáne ómir súrý sapasyn arttyrý» taqyrybynda ótken jıynǵa Aqtóbe, Atyraý, Mańǵystaý, Pavlodar oblystary jáne Shymkent qalasynan kelgen 200-ge jýyq delegat, Májilistegi partııa fraksııasynyń depýtattary, Ulttyq ekonomıka, Qarjy jáne Energetıka mınıstrlikteriniń, «Atameken» Ulttyq kásipkerler palatasynyń basshylary qatysty.
Sessııa jumysyn ashqan Májilis depýtaty, partııanyń saılaýaldy baǵdarlamasynyń «Kásipkerlikti qoldaý» boıynsha kýratory Meıram Pishembaev partııanyń 2030 jylǵa deıingi baǵdarlamasy uıymnyń proaktıvti áleýmettik saıasatqa kóshý ıdeıasyn ilgeriletetinin, makroekonomıkalyq saıasatty saqtaý sharalaryn iske asyratynyn, tehnologııalyq modernızasııany jáne ulttyq ekonomıkany sıfrlandyrýǵa serpin beretindigin atap ótti.
О́z kezeginde jıynda baıandama jasaǵan Májilis depýtaty Albert Raý partııanyń 2030 jylǵa deıingi baǵdarlamasynyń negizgi maqsat-mindetterine toqtaldy.
– Eń kúrdeli kezeńde Elbasy «qıyn bolady, biraq birige otyryp, osynyń bárinen attap ótemiz» dep sert bergen edi. Búginde kúni ótkenge kóz tastaı otyryp, óte kóp eńbektiń jasalǵanyn, eń aldymen Elbasynyń ýádesi jerde qalmaǵanyn kóremiz. Bizdi keıde «aldymen ekonomıka, sodan keıin saıasat» degen qaǵıdat úshin synap jatady. Biraq, ekonomıkalyq ósim barda áleýmettik máselelerdi sheshý ońaıǵa túsetini ras ekenine kelisetin bolarsyzdar. Bizdiń aldaǵy on jyldaǵy maqsat – árbir qazaqstandyqtyń ómir sapasyn arttyrý baǵytynda elimizdi júıeli túrde jańǵyrtý, – dedi A.Raý.
Al Ulttyq mýzeıde Memleket basshysynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalalarynda aıtylǵan ıdeıalary tóńireginde azamattardyń birigýi taqyrybyn qamtyǵan sessııa ótti.
Jıynǵa Májilis depýtattary, Mádenıet jáne sport, Aqparat jáne qoǵamdyq damý mınıstrlikteri jáne basqa da uıymdar men mekemelerdiń basshylary qatysty.
Otyrysty ashqan Májilis depýtaty Bekbolat Tileýhan «Rýhanı jańǵyrý» baǵdarlamasynyń júzege asyrylýyn qadaǵalaýdy Elbasy «Nur Otan» partııasyna tapsyrdy», dedi.
О́z kezeginde Mádenıet jáne sport vıse-mınıstri Aqtoty Raıymqulova «2017 jyldan bastap áleýmettik jańǵyrýǵa baǵyt aldyq. Onyń negizi Memleket basshysynyń qoǵamdyq sanany jańǵyrtýǵa baǵyttalǵan jalpyulttyq «Rýhanı jańǵyrý» baǵdarlamasy jáne «Uly dalanyń jeti qyry» atty eńbegi boldy. Osy tusta, Mádenıet jáne sport mınıstrligi eń aldymen mádenıet pen ónerdiń barlyq salalary men baǵyttaryn belsendi ózgertýge baǵdarlanǵan mádenı, saıası tujyrymdamasyn qabyldap ony júzege asyryp keledi», dep atap ótti.
О́z kezeginde «Nur Otan» partııasy janyndaǵy saıası menedjment akademııasynyń dırektory Janar Boqanova partııanyń pozısııasyn nyǵaıtý jónindegi negizgi faktorlar týraly aıtyp berdi.
Serik ÁBDIBEK,
Mádına JÁLELQYZY,
Svetlana ǴALYMJANQYZY,
«Egemen Qazaqstan»,
Móldir RYSHANQYZY,
stýdent