«Nur Otan» partııasynyń XVIII sezine qatysýshylar lebizi

Aqmaral ÁLNAZAROVA, Qyzylorda oblysy densaýlyq saqtaý basqarmasynyń basshysy:

– Búgin Elbasy – partııa Tóraǵasy uıymnyń aldaǵy on jyldyq josparyn baǵdarlap, jolyn kórsetip berdi. Bizge keregi – tek osy baǵytqa saı jumys isteý. Búgingi jıynda qaralǵan eń eleýli máselelerdiń biri – áleýmettik az qamtylǵan otbasylarǵa kórsetiletin kómek, sondaı-aq múmkindigi shekteýli azamattardy qoldaý boldy. Bul jaı ǵana sóz emes, naqty qarajat bólingen. 

О́zim eńbek etetin medısına salasyna toqtalsam, Qyzylorda oblysyndaǵy alǵashqy medısınalyq kómek kórsetý kórsetkishi qazirde 43 paıyzdy qu­raıdy. Sony 60 paıyzǵa deıin jetkizý – alǵa qoı­ǵan úlken mindet. Mine, osyǵan baılanysty ister atqaramyz. 

Bıyl «Nur Otan» partııasy­nyń 20 jyldyǵy. 20 jylda atqarǵan naqty ná­tıje – elimizdiń órkendeýine partııanyń, ondaǵy múshe­lerdiń qosqan eleýli úlesi. Sonymen qatar Qazaq­stannyń damýynda nurotandyqtardyń eńbegi zor. 

Búgingi aıtylǵan, kún tártibinde qaralǵan máse­lelerdi sheshýge, aldaǵy 10 jyldyqqa, onyń ishinde 2021 jylǵa deıingi oryndalatyn tapsyrmalarǵa Ulttyq qordan qosymsha qarajat bólinýi – úlken qamqorlyq, naqty bastama jáne elge kómek. 

 Bekzat ALTYNBEKOV, Qaraǵandy oblystyq máslıhatynyń depýtaty, kásipker:

– Sezden kútken úmitim aqtaldy. «Nur Otan» ejelden naq­ty ister partııasy dep ta­nylǵan. Elbasynyń osyǵan deıin berilgen tapsyrma­lary da oryndalǵan. Endi 2030 jylǵa deıingi merzimdi baǵdarǵa alǵan baǵdarla­ma­daǵy máseleler de sheshimin tabatynyna senim­dimin. Bul bizdiń halqymyzdy qýantady. О́ıtkeni baǵ­dar­la­ma­nyń negizgi maqsaty – halyqtyń ál-aýqatyn art­tyrý bolyp tur. 

Osy jumysty atqarý úshin Elbasy Ulttyq qor men bıýdjetten 2 trıllıonnan artyq qarajat bólgi­zetin boldy. Munshalyqty qarajattyń áleýmettik sa­laǵa buryn-sońdy bólingenin bilmeımin. Bıýd­jet­tiń barlyq shyǵystarynyń 45 paıyzy osy sala­ǵa baǵyttalady delindi. Ásirese kóp balaly ana­lar qýanatyn boldy, óıtkeni balalarǵa 21 myń teń­geden ataýly áleýmettik kómek kórsetiletin boldy. О́z basym halyqqa jasalatyn osyndaı qoldaýlarǵa qýa­nyp otyrdym. Halyq baı, qýatty bolsa, kásipker bolyp júrgen biz de baqýatty bolamyz. О́ıtkeni biz­diń kórsetetin qyzmetterimizge, shyǵaratyn ónim­derimizge alýshy tabylatyn bolady. Al halyq kedeı, tapqany tamaǵyna ǵana jetip otyrsa, ol eshteńe de almaıdy, óndiris toqtap, ónim óndirý quldyraıdy. 

Sembek SEIDÁZIMOV, Jambyl oblysy Qoǵamdyq keńesiniń tóraǵasy: 

– Búgingi kúni áleýmettik máseleler kúrdelenip tur. О́mir sapasyn jaqsartý kerek degen áńgimeler kópten berýi aıtylýda. «Nur Otan» partııasy osy máselelerdi zerdelep, halyqtyń jaǵdaıyn oılaıtyn sheshimder qabyldar dep kútken edik. О́ıtkeni joǵary damyp kele jatqan elde halqynyń turmysy da joǵary bolýy kerek qoı. Áıtpese joǵary damyǵanymyz, 30 damyǵan eldiń qataryna enetinimiz tek sóz ǵana bolady emes pe? 

Mine, Elbasynyń búgingi sózinen solarǵa jaýap alyp, qanaǵattanyp turmyz. Atap aıtqanda, halyqtyń ál-aýqatyn kóterýge, kóp balaly analardy qoldaýǵa, aýyldar arasyndaǵy joldardy jóndeýge orasan zor kólemde qarajat bólinip otyr. Endi sony Úkimet tıimdi jumsap, kóterilgen máselelerge oryndy paıdalansa eken degen tilegimiz bar. 

Elbasynyń jýyrda Úkimetti jańalaǵany da sol maqsatta ekendigi aıtyldy. Halyqtyń úmiti endi Úkimetke qarap tur. Bizdiń halqymyz jaqsy ómir súrýge laıyqty dep oılaımyn. Onyń ústine qazir eńbek etseń jaqsy turmysqa qol jetkizýge bolady. 

Alına SOLOVEVA, Qazaqstannyń Eńbek Eri, Shymkenttegi №1 mektep-gımnazııanyń bıologııa pániniń muǵalimi:

– Jalpy aıtqanda, men elimizge jańa ıdeologııa qabyldaý kerek dep oılaımyn jáne bul sózden qashýdyń qajeti joq. Ol – tabysty damýdyń ıdeologııasy bolý kerek. Men partııanyń basty maqsaty – adamdarǵa kómektesý jáne Úkimettiń jumysyna baqylaý jasaý dep oılamaımyn. Partııanyń negizgi jumysy ıdeologııa, ulttyq birlik, otansúıgishtik tárbıe, jastardyń durys jolmen damýyna yqpal etý bolýy kerek dep esepteımin. Elbasynyń búgingi sózderinen men ózimdi tolǵandyrǵan osyndaı birneshe máselege jaýap taptym. 

Naq óz jumysyma qatysty aıtatyn bolsam, jańa bilim berý salasyndaǵy eksperımentterdi toqtatyp, sapaly bilim men sanaly tárbıeni aldaǵy ýaqytta basty baǵdar etý kerektigi ataldy. Men ony óte durys dep sanaımyn. Ustazdar týraly zań da endi qabyldanyp, bizdiń túıtkildi máselemiz sheshiler degen úmittemin. Aıta ketetin jaıt, bul zań jobasynda men bolýy múmkin emes dep oılaıtyn máseleler de qarastyrylǵan. Sonyń ishinde muǵalimniń shyǵarmashylyǵyna qoldaý bildiriletini bizdi qýantty, árıne. 

Ibragım SÁRSENBAEV, Aqtóbe oblysyndaǵy «Naýryz Sım» jaýapkershiligi shekteýli seriktestiginiń dırektory:

– Aqtóbe oblysynyń Yrǵyz aýdanynan keldim. О́zderińiz biletindeı, bıyl «Nur Otan» partııasynyń qurylǵanyna jıyrma jyl toldy. Osy bir mereıli jyldy asyǵa kúttik. Bastaýysh partııanyń XVIII sezine delegat bolyp kelý – bizge úlken qurmet ári jaýapkershilik. Osyǵan deıingi sezderge kýá bolyp kelemiz, bul sezdiń burynǵylardan ózgesheligi – jıyndy, ondaǵy talqylanatyn máseleler men alǵa qoıylatyn mindetterdi bilýge barsha qazaqstandyqtardyń barynsha yqylas bil­dirgeni. Búgingi jıynda eldegi túıtkildi má­selelerge qatysty mańyzdy sheshimder qabyl­dan­dy. 

Partııanyń jarııalaǵan 2030 jyldarǵa ar­nal­ǵan baǵdarlamasy ómirsheń bolatyny belgili, óıtkeni onda aldaǵy on jylǵa arnalǵan jospar, úlken qadamdar men maqsattarǵa negizdelgen naqty áreketter qamtylǵan. Degenmen, menińshe, zamannyń árdaıym ózgerip otyratynyn eskersek, zamanǵa, ondaǵy problemalarǵa qaraı, bul baǵ­dar­lamanyń mazmuny men baǵyty da jaqsy jaǵyna ózgeredi. 

Kamıla KOVIаZINA,  Álemdik ekonomıka jáne saıasat ınstıtýtynyń sarapshysy:

– «Nur Otan» partııasy XVIII seziniń eń basty oqı­ǵasyna kelsek, Prezıdent N.Nazarbaev, birinshiden, 2018 jylǵy 5 qazandaǵy Jol­­daýynda jarııalaǵan bas­ta­­malaryn mazmundyq turǵyda jalǵastyrdy, ekin­shi jaǵynan, sońǵy kezde kóterilgen ózekti máseleler­ge jaýap berdi.

Ýáde etilgendeı, partııa músheleri, ákimder men memlekettik organdar jetekshileri usynǵan sharalardyń basym bóligi halyqtyń ál-aýqatyn jaqsartýǵa baǵyttaldy. Basty nazar kóp balaly otbasylar men az qamtylǵan turǵyndardy, sonymen birge bıýdjettik uıymdardyń qyzmetkerlerin qarjylaı qoldaýǵa aýdarylyp otyr. 

Memleket basshysy kúnkóris mınımýmynan joǵary tabys tabatyn kópbalaly otbasylardy kezinde kómekten aıyrý durys bolmaǵanyn atap ótti jáne muqtaj qazaqstandyqtardy belgili bir áleýmettik álsiz toptarǵa qosý talaptaryn qaıta qaraýdy tapsyrdy. Sonymen qatar kópshiliktiń ótinishi boıynsha, ondaı otbasyndaǵy járdemaqy kólemin ár balaǵa 21 myń teńgege arttyrýdy júktedi. Osy maqsatqa bıýdjetten qomaqty qarjy bólinetin bolady.

Qaırat AIDARHANULY, Astanadaǵy «Shıpaly» emdeý ortalyǵynyń dırektory, densaýlyq saqtaý salasynyń úzdigi:

– «Nur Otan» partııasy bú­ginde elimizdegi jetekshi par­tııaǵa aınalyp, naqty nátı­jeniń partııasy atandy. Partııa kótergen barlyq máse­leler oń sheshimin tabýda. Men óz salam boıynsha aı­tar bolsam, búginde elimizde medısına salasy qarqyndy damyp keledi. Otandyq medısınanyń ózge eldermen básekege túsý qabilettiligi jyl ótken saıyn artyp keledi. Sondaı-aq el damýynyń negizgi kórsetkishi – halyqtyń ál-aýqaty ósip, ómir súrý jasy uzardy. 

Sonymen qatar, partııanyń kezekti sezinde qazaqstandyqtardyń ómir sapasyn arttyrý jumysyna erekshe nazar aýdaryldy. Munda áleýmettik máseleler jan-jaqty kóterilip, onyń tıimdi sheshimin tabý úshin kóptegen sharalar qabyldandy. Sonyń ishinde Elbasy Nursultan Nazarbaev kóp balaly, az qamtylǵan otbasylar jáne áleýmettik qorǵaýdy qajet etetin toptarǵa memlekettik qoldaý jasaýdyń qarjylaı tetikterin jaqsartý asa mańyzdy ekenin atap kórsetti. Munyń barlyǵy elimizdegi adamnyń damý ındeksin kóterý, densaýlyǵyn jaqsartý máselesin sheshýge tikeleı áser etedi.