Gonkongta jeńil atletıkadan 18 jasqa deıingi sportshylar arasyndaǵy úshinshi Azııa chempıonaty aıaqtaldy. 15-17 naýryz kúnderi ótken qurlyq dodasyna jalpy esebi 300-ge jýyq sportshy qatysty dep habarlaıdy Olympic.kz.
Azııa birinshiliginde Qazaqstan atynan 2002-2003 jyly týǵan 17 sportshy baq synady.
2 altyn, 1 kúmis jáne 4 qola medal ıelengen Qazaqstan quramasy komandalyq esepte besinshi orynǵa taban tiredi. Birinshi orynda Qytaı, ekinshi orynda Úndistan, úshinshi satyda Japonııa komandalary.
2017 jyly Taılandta ótken chempıonatpen salystyrǵanda, bul doda bizdiń komanda úshin sátti ótti. О́ıtkeni, eki jyl burynǵy synda qazaqstandyq sportshylar bir kúmis jáne bir qola medaldy qanaǵat tutqan.
Birinshi jarys kúninde Polına Ivanova syryqpen sekirýden Azııa chempıony atansa, Vasılısa Fahrýtdınrova 2000 metrge kedergiler arqyly júgirýden kúmis medal jeńip aldy.
Ekinshi jarys kúninde Efım Tarasov 400 metrge jarysýdan úshinshi oryn ıelense, Aleksandra Zalıýbovskaıa osy qashyqtyqta úzdikter qataryna endi.
Jarystyń úshinshi kúninde Adına Maqsutova kópsaıystan chempıon atanyp qoımaı, qurlyq dodasnyń jańa rekordyn ornatty. Jeti saıystyń beseýinde jeńiske jetip, 5345 upaı jınaǵan sportshymyz altynnan alqa taqty.
Sondaı-aq, qazaqstandyq sportshylar estafeta men úsh qarǵyp sekirýden qola júldeger atandy.