Almatyda «Nur Otan» partııasy qalalyq fılıalynyń bastamasymen «Baqytty otbasy – Almaty» qoǵamdyq qory quryldy. Qordyń jumysy jáne az qamtylǵan kópbalaly otbasylarǵa kórsetiletin kómek túrleri jóninde partııanyń qalalyq fılıaly tóraǵasynyń birinshi orynbasary Stanıslav Kankýrov aıtyp berdi. Bul týraly Almaty qalasy ákimdiginiń baspasóz qyzmeti habarlady.
Qor kimderge kómek kórsetedi?
Almatyda turaqty tirkeýi jáne ataýly áleýmettik kómek alýǵa quqyǵy bar (turmysy tómen) kópbalaly az qamtylǵan otbasylarǵa.
Qandaı kómek túrleri kórsetiledi?
Qor mynadaı kómek túrlerin kórsetedi:
- Asyraýshysynan aırylǵanda 1 jylǵa deıin birettik tólem beriledi;
- Aýyr syrqatqa ushyraǵan kezde mindetti medısınalyq qyzmet tizimine enbeıtin medısınalyq kómektiń birrettik tólemi;
- Jeke menshiktegi apatty úıge jóndeý jumystaryn júrgizý men turǵyn úı jaǵdaıyn jaqsartý úshin beriletin birrettik tólem;
- Jaraqat alǵanda jumys isteý múmkindiginen aırylyp, reablıtasııa kezindegi aı saıynǵy tólem;
- Azyq-túlik sertıfıkattaryn berý;
- Balalardyń kıimi men aıaq kıimine sertıfıkattar berý;
- Balalar men múgedekter ata-analarynyń turǵyn úıge beıimdelýine kómek kórsetý;
Kómek alý úshin qandaı qujattar qajet?
- Joǵaryda atalǵan kómekterdiń kez-kelgenin alý úshin myna qujattardy usyný qajet: jazbasha ótinish, árbir alýshynyń jeke málimetterin jınaý úshin kelisim, ata- analardyń jeke kýálikteri men balalardyń týý kýálikteri, ataýly kómektiń berilýi jóninde aýdandyq áleýmettik ál-aýqat bóliminiń anyqtamasy. Kómektiń jekelegen túrleri boıynsha kestede kórsetilgen qosymsha qujattar talap etiledi.
Qujattar qaıda tapsyrylady?
- Siz Almaty qalasyndaǵy «Nur Otan» partııasynyń kez kelgen fılıalyna tapsyra alasyz.
Bul kómekter jıi kórsetile me, kópbalaly jáne turmysy tómen otbasylarǵa qor qansha merzimge deıin kómektese alady?
- Biz kómektiń bir túri boıynsha birrettik qoldaý kórsetemiz. Qor ashyq jáne turaqty negizde jumys jasaıdy. Atalǵan sharttar boıynsha biz jyldyń sońyna deıin qujattar qabyldaýdy josparlaýdamyz.
Eger otbasynyń turaqty tirkeýi joq bolsa nemese ýaqytsha tirkeýde tursa she?
- Mundaı jaǵdaıda «Nur Otan» partııasynyń ár aýdandaǵy Qoǵamdyq qabyldaýyndaǵy «biryńǵaı áldeýmettik terezege» júgingen jón. Baılanys málimetterin partııanyń Nurotan.kz. saıtynan tabýǵa bolady.
О́z kezeginde «Baqytty otbasy – Almaty» qoǵamdyq qorynyń dırektory Gýlnas Ahmetova azamattar men uıymdar tarapynan jınalǵan qarjydan ataýly kómekti berý úshin Áleýmettik ál-aýqat qory aýdandyq ákimdiktermen birge keshendi skrınıng uıymdastyratynyn, ár otbasyn aralap shyǵatyndyqtaryn aıtty, osynyń negizinde kómekke zárýlerdiń bazasy jasalady.
«Kúni keshe ǵana biz quny 11 mln 400 myń teńge bolatyn azyq-túlik kárzeńkesiniń 400 sertıfıkatyn jáne quny 10 mln 800 myń teńge bolatyn balalar kıimderiniń 200 sertıfıkatyn satyp aldyq. Barlyq shyǵyndardy depýtattardan, qoǵam belsendilerinen, blogerlerden jáne turmysy tómen kópbalaly otbasylar ókilderinen quralǵan qadaǵalaý keńesi jiti baqylaıtyn bolady. Qordyń qamqorshylar keńesi ár jarty jyl saıyn qaıyrymdylyq boıynsha iske asqan jobalar týraly kópshilik aldynda esep beredi jáne ol qordyń arnaıy saıtynda, basqa da buqaralyq aqparat kózderinde jarııalanady», - dep atap ótti Gýlnas Ahmetova.
Aıta keterligi, buryndary Almaty ákimi Baýyrjan Baıbek qalanyń turmysy tómen kópbalaly otbasylaryna keshendi qoldaý kórsetýdiń naqtyly merzimi men sharalaryn atap ótken edi, olar - jeńildetilgen ıpoteka, oqýshylar men stýdentterdiń stıpendııalary, turmysy tómen kópbalaly otbasylardyń ekinshi balasynan bastap tegin bala baqsha, eńbekpen qamtý, analar Ortalyǵyn ashý jáne basqalary.
Jalpy, halyqtyń az qamtylǵan tobyna, onyń ishinde turmysy tómen kópbalaly otbasylarǵa keshendi qoldaý kórsetý úshin bıylǵy jyly Almatyda qosymsha 5,5 mlrd teńgeden astam qarjy bólinetin bolady.