Ulystyń uly kúni qarsańynda Katonqaraǵaı aýdanyndaǵy Balǵyn aýylynyń turǵyndary kópbalaly ana Nadejda Konstantınovany qushaq jaıa qarsy aldy.
Aýdannyń týmasy, kásipker, «Tereze» JShS dırektory Janbolat Qazanov «Baqytty otbasy» ulttyq jobasy aıasynda bes bala tárbıelep otyrǵan anaǵa óz qarajatyna baspana tartý etti. Kómir men otyndy aýyl turǵyndary jetkizip beripti. «Buǵan deıin Úlken Naryn aýylynda turdyq. Balalarym jalań aıaq júgirip, asyr salyp oınaıtyn jyly, úlken úıimiz bolsa dep armandaıtyn edik. Arman-tilegimiz oryndalǵandaı. Kórshilerim, balǵyndyqtar sondaı meıirimdi jandar, kelip kómektesip jatyr. Budan bylaı biz úshin, balalarym úshin baqytty kezeńder bastaldy dep oılaımyn. «Jańa úı jańa ómirdiń bastaýy» dep beker aıtpaıdy ǵoı. Barshańyzǵa kóp rahmet», - deıdi qýanyshy qoınyna syımaǵan Nadejda.
Erekshe atap óterligi, Nadejdaǵa baspana syılaǵan kásipker ózi týǵan aýyl – Balǵynǵa kópbalaly jáne az qamtylǵan otbasylardy kóshirý úshin óz qarajatyna 5 úı satyp alypty. Nadejda alǵan baspana – sol 5 úıdiń biri. «Qazirgi tańda halyqtyń aýyldy jerlerden qalaǵa kóship, ketip jatqany jasyryn emes. Bul - óte ózekti másele. Sondyqtan jergilikti bilim shańyraqtaryndaǵy oqýshylar sanyn saqtaý úshi, aýylǵa azamattardy tartý maqsatynda mesenattarmen birge kópbalaly, az qamtylǵan otbasylarǵa osyndaı kómek kórsetýdi jón kórdik. Eki jaqqa da tıimdi sheshim dep oılaımyn. Kelisimshartqa saı osy úıde bes jyl turǵannan keıin Nadejda baspanany óz atyna tegin aýdaryp alady», – deıdi Katonqaraǵaı aýdanynyń ákimi Ahmetqalı Nurǵojın.
«Nur Otan» partııasy oblystyq fılıalynyń baspasóz qyzmetiniń habarlaýynsha, aýdan ákimi de óz atynan kópbalaly otbasyǵa tońazytqysh tartý etipti. Al «Nur Otan» partııasynyń jergilikti fılıalynyń qyzmetkerleri azyq-túlik, jatar oryn jabdyqtary, sonymen qatar turmysqa qajetti zattardy jetkizip beripti.
Azamat QASYM,
«Egemen Qazaqstan»
Shyǵys Qazaqstan oblysy,
Katonqaraǵaı aýdany