Qarjy mınıstrliginiń málimetinshe, bıyl qańtar aıynda bastalǵan salyq raqymshylyǵyna shaǵyn jáne orta bıznestiń 90 077 nysany ilinedi.
Salyq tóleýshilerdiń 31 210-y zańdy, 58 867-si jeke tulǵa bolýy múmkin. Aıta keteıik, ShOB ókilderi qazynaǵa salyq túrinde 340,6 mlrd teńge qaryz. Kórsetilgen soma jyl sońyna deıin óteletin bolsa, kásipkerlerge aıypul salynbaıdy jáne olar ósimpul tólemeıdi. Negizgi qaryzdaryn ótegen ShOB ókilderine memlekettik kirister organdaryna habarlasyp, aıypul men ósimpul tólemeý týraly ótinish jazýdyń qajeti joq.
Aıypul men ósimpul avtomatty túrde joıylyp, zań qaryzyn keıinge shegergen salyq tóleýshilerge ǵana qoldanylmaıdy. Osydan bir apta burynǵy resmı derekke júginsek, el boıynsha 33 121 salyq tóleýshi 2018 jyldyń 1 qazanynan bergi 7,3 mlrd teńge qaryzyn qaıtarǵan. Memleket olardyń 1,6 mlrd teńge ósimpuly men 208 mln teńge aıyppulyn qaryz esebinen alyp tastaıtyn boldy.
Bul týraly premer-mınıstrdiń birinshi orynbasary-qarjy mınıstri Álıhan Smaılov: «Salyq raqymshylyǵy elimizdiń bıznes-klımaty men iskerlik atmosferasyn jaqsartý jáne ShOB ókilderine qaryzdaryn qaıtarý múmkindigin berý úshin jasalyp otyr. Biz kásipkerlerdi qoldaýǵa, olarǵa jaǵdaı jasaýǵa tıispiz. Sebebi olar qazyna qarjysyn eselep otyrady», – dedi.
Qazirgi ýaqytta bıznesti jáne saýda qyzmetin qoldaý týraly zań Parlamentte qaralýda.
«Bıznestiń jol kartasy – 2020» baǵdarlamasy 2025 jylǵa deıin uzartyldy. 2019 jylǵy qańtarda shaǵyn jáne orta bızneske salyqtyq raqymshylyq jasalady.
О́ńdeýshi ónerkásipti jáne shıkizattyq emes sektordy qoldaýǵa, ulttyq valıýtanyń uzaq merzimdi ótimdiligin usynýǵa, agrarlyq sektordy damytýǵa jáne aýyl sharýashylyǵy ónimderiniń eksportyn arttyrýǵa qarajat bólindi.
2019-2021 jyldar aralyǵynda bıznesti qoldaý mindetterine 938 mlrd teńge, agroónerkásip keshenin damytýǵa – 300 mlrd teńge, óńdeý salasyn damytýǵa – 190 mlrd teńge, ShOB damytýǵa – 90 mlrd teńge jáne jalǵa beriletin turǵyn úı qurylysyna – 30 mlrd teńge bólý josparlanýda. Gúlbarshyn SABAEVA,
«Egemen Qazaqstan»
ALMATY