Global Times gazeti Elbasy N.Nazarbaevtyń Prezıdenttik ókilettiginen bas tartýyna qatysty jazǵan maqalasynda Qazaqstannyń álemdik arenadaǵy bedeli Tuńǵysh Prezıdentpen tikeleı baılanysty ekenin jazady.
«Nazarbaevtyń jetistikteri onyń Qazaqstan tarıhyndaǵy eń iri saıasatker ekenin kórsetedi. Ol Keńes Odaǵy ydyraǵanǵa deıin de eldi basqarǵan. Onyń kýágeri boldy. Qazaqstan táýelsizdik alǵannan keıin Nazarbaev óz eliniń jaǵdaıyn odan ári jaqsartý úshin damýdyń qolaıly jolyn tańdady. Bul Qazaqstandy Ortalyq Azııadaǵy eń bedeldi elge aınaldyrdy», deıdi basylym.
Sondaı-aq Global Times N.Nazarbaev naryqtyq ekonomıkaǵa kóshý arqyly táýelsizdiktiń alǵashqy jyldaryndaǵy túrli qıyndyqtardy eńsergenin atap kórsetken.
«Nazarbaev ekonomıkany damytý jónindegi birqatar strategııalardy ázirledi. Sonyń nátıjesinde Qazaqstan jan basyna shaqqanda IJО́-i 10 000 AQSh dollarynan asatyn álemniń 50 jetekshi eliniń qataryna kirdi. Qazaqstannyń endigi mindeti – álemniń eń úzdik 30 eliniń qataryna kirý. Qazaqstan bul atqa laıyq derjavaǵa aınaldy», dep atap ótken maqala avtory.
Budan bólek basylym Elbasynyń syrtqy saıasatta ártaraptandyrylǵan jáne teńdestirilgen dıplomatııalyq strategııany jaqtaǵanyn keltiredi. Sonyń nátıjesinde Ortalyq Azııadaǵy kórshi eldermen qarym-qatynas damyp, tarıhtan qalǵan shıelenister oń sheshimin tapqan.
«Nazarbaev Táýelsiz Memleketter Dostastyǵyna, Ujymdyq qaýipsizdik týraly shart Uıymyna jáne Eýrazııalyq ekonomıkalyq odaqqa kirý, sondaı-aq Reseımen baılanysty damytý sııaqty óńirlik qatynastardy jaqsartýǵa baǵyttalǵan birqatar tetikter men usynystarǵa bastamashylyq etti. Eýropalyq derjavalarmen jáne AQSh-pen jaqsy qarym-qatynasta bolýdy qoldady. Nazarbaev birneshe ret AQSh pen eýropalyq elderge is-saparmen bardy. Qytaımen jan-jaqty áriptestik qarym-qatynas ornatty. Shanhaı yntymaqtastyq uıymymen jáne halyqaralyq yntymaqtastyqtyń artýy úshin «Bir beldeý, bir jol» bastamasy boıynsha Qazaqstannyń keńistigin keńeıtti», delingen Global Times gazetinde jarııalanǵan maqalada.
Sondaı-aq Global Times basylymy Qazaqstannyń abyroıy tikeleı N.Nazarbaevpen baılanysty ekenin aıtady.
«Qazaqstannyń dańqy kóp jaǵdaıda Nazarbaevqa baılanysty dep aıtýǵa bolady. Endi Qazaqstannyń Ortalyq Azııada jetekshi ról ıelenip, basqa iri derjavalardyń arasynda tepe-teńdik saqtaı otyryp damý máselesi aldaǵy kúnniń enshisinde», dep túıindeıdi maqala avtory.