«Nur Otan» partııasy Tóraǵasynyń birinshi orynbasary Máýlen Áshimbaevtyń tóraǵalyǵymen Qazaqstan Respýblıkasynyń astanasyn Nur-Sultan qalasy dep qaıta ataýǵa qoldaý bildirý maqsatynda Demokratııalyq kúshterdiń «Qazaqstan-2050» jalpyulttyq koalısııasynyń kezekti otyrysy ótkizildi. Onda 6,5 mıllıon qazaqstandyqtyń múddesin bildiretin koalısııa músheleri el tarıhyndaǵy eń mańyzdy ári asa jaýapty bul sheshimniń mánine toqtalyp, onyń ári qaraı damýymyzǵa tıgizer áseri jaıynda sóz qozǵady.
Otyrysty ashqan «Nur Otan» partııasy Tóraǵasynyń birinshi orynbasary qazirgi tańda Qazaqstan halqynyń tarıhı kezeńdi bastan keshirip jatqanyn aıtty. Sondaı-aq ol Elbasynyń óziniń prezıdenttik ókilettigin toqtatý týraly sheshimi bir sátte qabyldanbaǵanyn, ol úshin Tuńǵysh Prezıdentimiz uzaq oılanyp, barlyq máseleni saralap, salmaqtaǵanyna nazar aýdardy.
– Elbasy qashanda el men halyqtyń múddesin birinshi kezekke qoıyp, árdaıym durys sheshimder qabyldaıdy. Qazaqstan halqy úshin Tuńǵysh Prezıdentimizdiń esimi árdaıym memlekettilik, egemendik jáne táýelsizdik sııaqty asa mańyzdy qundylyqtarmen bir qatarda turady. Qazirdiń ózinde Elbasynyń esimi táýelsiz memleketimizdiń negizin qalaýshy, barlyq reformalardyń avtory, álemdik deńgeıdegi saıasatker retinde tarıhymyzǵa altyn áriptermen jazylatyny sózsiz, – dedi M.Áshimbaev.
Sonymen qatar «Nur Otan» partııasy Tóraǵasynyń birinshi orynbasary Elbasynyń Qazaqstandy Keńes Odaǵynyń artta qalǵan respýblıkalarynyń birinen zamanaýı, damyǵan, búkil álem biletin aldyńǵy qatarly memleketke aınaldyrǵanyn aıtty. Onyń sózinshe, Elbasymyzdyń ekonomıkalyq jáne saıası reformalary men aýqymdy jańǵyrý baǵdarlamasy elimizdiń jan-jaqty damýyn qamtamasyz etti.
– Halyqtyń ál-aýqatynyń eselep ósýi de Nursultan Ábishulynyń eren eńbeginiń basty jetistikteriniń biri. Tuńǵysh Prezıdentimiz únemi halyqtyń ómir súrý sapasyn arttyrýǵa, jastar men kóp balaly otbasylardy qoldaýǵa, bilim berý men densaýlyq saqtaý salalaryn damytýǵa kóńil bólip, basty nazarda ustap keldi, – dedi M.Áshimbaev.
Sondaı-aq ol qazirgi tańda búkil álem elimizdi bitimgershilik bastamalary arqyly da óte jaqsy tanıtynyn jáne astanamyzdyń eń ózekti jahandyq máselelerdi talqylap, oń sheshim shyǵaratyn halyqaralyq ortalyqqa aınalǵanyna nazar aýdardy.
– Nursultan Ábishuly Nazarbaev Qazaqstan tarıhynda táýelsiz memlekettiń negizin qalaǵan, qazaqtyń memlekettiligin qaıta jandandyrǵan uly tulǵa retinde máńgi qalady. Sol sebepti, qazirgideı tarıhı kezeńde qazaqstandyq qoǵam birlikti tý etip, Elbasynyń strategııalyq saıasatynyń aıasynda ári qaraı birigýi tıis jáne qoǵamymyz Tuńǵysh Prezıdentimiz anyqtap bergen jolmen júrip, óziniń birtutastyǵyn kórsetýi qajet, – dedi M.Áshimbaev.
Odan bólek, «Nur Otan» partııasy Tóraǵasynyń birinshi orynbasary Elbasynyń erik-jigeri men tabandylyǵynyń arqasynda táýelsiz memleket bolyp qalyptasqan Qazaqstannyń barlyq jeńisteri men jetistikteri Tuńǵysh Prezıdentimizdiń esimimen tyǵyz baılanysty ekenin tilge tıek etti. Sondyqtan Máýlen Áshimbaev Nursultan Nazarbaevtyń aldaǵy ýaqytta da Elbasy, Qaýipsizdik Keńesiniń Tóraǵasy, «Nur Otan» partııasynyń Tóraǵasy, Qazaqstan halqy Assambleıasynyń Tóraǵasy, Konstıtýsııalyq Keńestiń múshesi retinde eldiń strategııalyq damýyna aıryqsha yqpal etetin uly tulǵa bolyp qalatynyn, onyń óz ókilettigin toqtatý týraly sheshimi de zańǵa sáıkes ekenin aıtty.
– Bul ıgi is ishki turaqtylyqty nyǵaıtyp, Qazaqstannyń halyqaralyq abyroı-bedelin arttyra túsedi. Elbasynyń bul tarıhı sheshimi bolashaq saıasatkerlerge úlken úlgi-ónege ekeni sózsiz. Osylaısha Qazaq eli zamanaýı, quqyqtyq jáne demokratııalyq memleket qurý jolynda asa mańyzdy qadam jasady, – degen M.Áshimbaev osyndaı sátte barsha qazaqstandyqtar judyryqtaı jumylyp, birlik pen turaqtylyqtyń jarqyn úlgisin kórsetý kerektigin aıtty.
Sondaı-aq astanamyzǵa Elbasy esimin berý elimizdiń damý jolynda Tuńǵysh Prezıdent saıasatynyń odan ári jalǵasatynyn kórsetetin mańyzdy shara ekenin aıtqan M.Áshimbaev osylaısha qazaqstandyqtar N.Nazarbaevtyń táýelsiz Qazaqstannyń negizin qalaýdaǵy jáne onyń astanasyn salýdaǵy eren eńbegine qurmet kórsetip otyrǵanyn jetkizdi.
«Nur Otan» partııasy Tóraǵasynyń birinshi orynbasary el damýynyń jańa kezeńindegi tarıhı sheshimdi barlyq negizgi saıası partııalar men qoǵamdyq kúshter qoldap otyrǵanyn, oǵan demokratııalyq kúshterdiń jalpyulttyq koalısııasynyń búgingi otyrysy dálel ekenin tilge tıek etti.
Otyrysqa eldegi jetekshi partııalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysty. Jıyn barysynda koalısııa músheleri elordamyzǵa Elbasy esimin berý týraly óz oılaryn ortaǵa salyp, pikirlerimen bólisti. Atap aıtqanda, Qazaqstan kommýnıstik halyq partııasynyń hatshysy, Májilis depýtaty Jambyl Ahmetbekov, «Aýyl» halyqtyq-demokratııalyq patrıottyq partııasynyń tóraǵasy, Parlament Senatynyń depýtaty Álı Bektaev, «Birlik» saıası partııasynyń tóraǵasy Serik Sultanǵalı, Halyq Qaharmany, «Qarýly kúshterdiń ardagerleri» respýblıkalyq qoǵamdyq birlestigi úılestirý keńesiniń tóraǵasy Muhtar Altynbaev, Elbasynyń bes áleýmettik bastamasynyń júzege asyrylýyn baqylaý jónindegi qoǵamdyq keńestiń tóraǵasy, Parlament Senatynyń depýtaty Baqytjan Jumaǵulov, «Aq jol» demokratııalyq partııasy tóraǵasynyń orynbasary Qazybek Isa, «Atameken» ulttyq kásipkerler palatasynyń basqarma tóraǵasy Abylaı Myrzahmetov, Qazaqstan Respýblıkasy Kásipodaqtar federasııasynyń tóraǵasy Baqytjan Ábdiraıym jáne «Qazaqstan ardagerleri» qaýymdastyǵynyń tóraǵasy, Parlament Májilisiniń depýtaty Baqytbek Smaǵul sóz alyp, Elbasy esiminiń elordamyzǵa berilýi el damýynyń jańa kezeńin anyqtaıtyn asa mańyzdy qadam ekenin aıtty.
Is-shara sońynda barsha qazaqstandyqty Qazaqstannyń Tuńǵysh Prezıdenti aıqyndaǵan eldiń strategııalyq basymdyqtaryna sózben de, ispen de tolyq qoldaý kórsetýge jáne Elbasynyń táýelsizdikti kúsheıtýge, eldi júıeli jańǵyrtýǵa, sondaı-aq árbir qazaqstandyqtyń ál-aýqatyn arttyrýǵa baǵyttalǵan saıasatyn birlesip jalǵastyrýǵa, astanamyzdyń ataýyn ózgertý týraly tarıhı sheshimge ún qosýǵa shaqyrǵan Úndeý qabyldandy.
Serik ÁBDIBEK,
«Egemen Qazaqstan»