Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın Ulystyń uly kúni – Naýryz merekesi kezinde halyqty tamaqtan ýlanýdan saq bolýǵa shaqyrady.
Mereke qarsańynda arnaıy brıfıng ótkizgen Bas memlekettik sanıtarlyq dáriger ótken jyly Naýryz kezinde elimiz boıynsha qoǵamdyq tamaqtaný ornynan as ishken 15 kisiniń, otbasynda tamaqtanǵan 6 kisiniń ýlanǵanyn aıta kelip, erekshe kóńil bóletin jaıttarǵa toqtaldy.
«Naýryz meıramynda eń jıi kezdesetin jaǵdaı – tamaqtan ýlaný men jedel ishek ınfeksııasy. О́ıtkeni merekede tamaqty 3-4 kúnge deıin saqtap, paıdalanatyn jaǵdaılar jıi kezdesedi. Kez kelgen taǵamdy muzdatqyshta 6-8 saǵattan artyq saqtaýǵa bolmaıdy. Naýryz kójege kóbinese ystalǵan, súrlengen et qosylatyndyqtan, ony uzaq saqtaǵanda quramyndaǵy maı tez búlinedi. Ásirese qus ónimderiniń quramyndaǵy salmonellez sııaqty keıbir qozdyrǵyshtar – 20 gradýsta kóbeıedi. Sondyqtan biz mektepterge, balabaqshalar men qoǵamdyq uıymdarǵa úıde daıyndalǵan taǵamdardy ákelýge tyıym salamyz. Ekinshiden, meıli úıde nemese úlkendi-kishili qoǵamdyq tamaqtaný oryndarynda bolsyn, shıki taǵam men daıyn tamaqqa eshýaqytta bir taqtaıdy, bir pyshaqty qoldanýǵa bolmaıdy jáne ony bir ret qoldanýǵa arnalǵan qolǵaptarmen ustaý kerek. Sondaı-aq ony tońazytqyshqa da bólek qoıý kerek», deıdi J.Bekshın.
Ásirese sertıfıkaty men medısınalyq kitapshasy joq ashana, meıramhanalarda tamaqtanýdan jáne bazarlarda shıki azyq-túlik alýdan saq bolýdy erekshe eskertti. «Qazir shaǵyn kásipkerlikti qorǵaıtyn kóptegen erejeler bolǵandyqtan 50 oryndyqqa deıingi dámhanalarda, taǵam daıyndaıtyn oryndarǵa tekserýge bara almaımyz. Sondaı-aq azyq-túlik satatyn dúkenderdi de josparly túrde teksermeımiz. Tutynýshylardyń aryz-shaǵymy túsken jaǵdaıda ǵana teksere alamyz. Sondyqtan tamaqtanýdan buryn ashanalar men meıramhanalardan medısınalyq kitapshasyn talap etińiz. Bazarlardaǵy shıki azyq-túlik satýshydan sertıfıkat talap etińiz. Bul sizdiń quqyńyz. Ondaı faktiler anyqtalǵan jaǵdaıda bizdiń jergilikti organdarǵa habarlap nemese sanıtarlyq dárigerlerdi shaqyrtý kerek. Polısııa qyzmetkerleriniń kómegine júginýge de bolady», dedi Jandarbek Muhtaruly.
Meıram kezinde alańdar men kóshelerde saýda dúkenderi men dúńgirshekterden tys jerlerde jeke adamdardyń qolynan tamaq jemeýdi de eskertken Bas memlekettik sanıtarlyq dáriger kez kelgen satýshydan jergilikti densaýlyq saqtaý uıymdarynyń ónimniń assortımentine baılanysty ruqsaty bar-joǵyn anyqtap alý kerektigin aıtady.
Maıgúl SULTAN,
«Egemen Qazaqstan»