NurOtanTrends pikirtalas alańynyń kezekti otyrysyna qatysýshylar eldegi saıası ózgeristerge nazar aýdaryp, «Qazaqstan saıasatynyń jańa kelbeti» taqyrybynda sóz qozǵady. Soǵan baılanysty sarapshylar elimizdiń aldynda turǵan qoǵamdyq-saıası jáne áleýmettik-ekonomıkalyq salalarǵa qatysty basymdyqtar men jańa talaptar jaıyn talqylady.
О́z sózinde «Nur Otan» partııasy Tóraǵasynyń birinshi orynbasary Máýlen Áshimbaev Elbasynyń tarıhı sheshimi el damýynyń jańa kezeńin bastap bergenin aıtty. Soǵan baılanysty ol ár qazaqstandyqtyń eldiń bolashaǵyna beıjaı qaramaı, belsendilik tanytýy mańyzdy ekenin jetkizdi.
– Qazirgideı el damýyna tikeleı áser etetin oqıǵalar kezinde qoǵamnyń aýyzbirshiligi men birtutastyǵyn saqtaý óte mańyzdy. Sondyqtan osyndaı kezeńde qazaqstandyqtar judyryqtaı jumylyp, ár azamat óz jaýapkershiligin túsinip áreket etýi kerek. О́ıtkeni mundaı jaǵdaıdy óziniń jeke múddelerine paıdalanyp, el arasyna iritki salýdy kózdeıtin keıbir kúshterdiń bar ekeni belgili. Sondyqtan árqaısymyz elimizdiń bolashaǵyna jaýapkershilikpen qarap, qoǵamdaǵy birlik pen berekeni saqtaýǵa kúsh jumsaýymyz qajet, – dedi M.Áshimbaev.
Sonymen qatar «Nur Otan» partııasy Tóraǵasynyń birinshi orynbasary Elbasy saıasatyn odan ári jalǵastyrýdyń mańyzy men Tuńǵysh Prezıdentimiz anyqtap bergen joldyń basymdyqtaryna toqtaldy.
– Elbasy saıasatynyń negizinde elimizdiń jańa kezeńimen birge bolashaǵy úshin de asa mańyzdy maqsattar men qundylyqtar bar. Atap aıtqanda, táýelsizdik pen memlekettilikti kúsheıtý, elimizde kásipkerlikti damytý, jekemenshik ıelerine qoldaý kórsetý, tıimdi áleýmettik saıasatty iske asyrý, beıbitshilik pen kelisimdi saqtaý jáne eń damyǵan elderdiń qataryna qosylýǵa baǵyttalǵan jumystardy odan ári jalǵastyrý sııaqty basymdyqtar Elbasy saıasatynyń negizi bolyp sanalady. Bul qundylyqtar men maqsattar bir kúndik emes. О́ıtkeni olar bizdiń bolashaǵymyzdy aıqyndaıtyn sıpatqa ıe. Sondyqtan qazirgideı tarıhı kezeńde Tuńǵysh Prezıdentimizdiń elimizdi odan ári damytýǵa baǵyttalǵan strategııalyq maqsattaryn júzege asyrýǵa ár azamat óz úlesin qosýy kerek, – dedi M.Áshimbaev.
Otyrys barysynda Elbasynyń Qaýipsizdik Keńesiniń Tóraǵasy jáne «Nur Otan» partııasynyń Tóraǵasy bolyp qala berýi atalǵan saıası ınstıtýttardyń rólin odan ári kúsheıtetini de aıtyldy. Bul jóninde Máýlen Áshimbaev partııanyń halyqtyń birligin saqtap, Nursultan Ábishuly Nazarbaevtyń jolyn jalǵastyrýdaǵy jaýapkershiligi arta túskenin aıtty.
– Elbasymyzdyń atalǵan qurylymdardyń tóraǵasy bolyp qalýy bul ınstıtýttardyń jaýapkershiligin arttyra túsedi. «Nur Otan» partııasy osy jaýapkershilikti sezine otyryp, elimizdegi barlyq saıası kúshpen áriptestik ornatýǵa daıyn. Biz ár taraptyń ustanymyna qurmetpen qarap, eldik múdde jolynda birlesip jumys isteý úshin ózimizdiń barlyq alańdarymyzdy paıdalanýǵa daıynbyz. Qajet bolsa, jańa alańdardy da iske qosamyz. Bizdiń basty maqsatymyz – Elbasynyń ekonomıkalyq, saıası, áleýmettik saladaǵy jańǵyrý baǵytyn júzege asyrýdyń tıimdi tetikterin pysyqtaý. Sondyqtan partııamyz barlyq múddeli toppen jumys isteýge daıyn, – dedi «Nur Otan» partııasy Tóraǵasynyń birinshi orynbasary.
Otyrystyń moderatorlyq mindetin dástúrge saı «Talap» qoldanbaly zertteýler ortalyǵynyń dırektory Rahym Oshaqbaev atqardy. Pikirtalas barysynda qoǵam qaıratkeri, saıasattanýshy Aıdos Sarym, Parlament Májilisiniń Zańnama jáne sot-quqyqtyq reforma komıtetiniń tóraǵasy Nurlan Ábdirov, Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Sanat Kóshkinbaev jáne «Nur Otan» partııasy janyndaǵy Strategııalyq bastamalar ınstıtýty dırektorynyń orynbasary Evgenıı Kochetov qatysyp, óz pikirlerin bildirdi.
Joldybaı BAZAR,
«Egemen Qazaqstan»