Mańǵystaý oblysy «Qalamqas» ken orynda bolǵan jaǵdaıǵa baılanysty Ekologııa departamenti monıtorıngtik tekseris jumystaryn júrgizýde.
«Azamattardy birinshi tolǵandyratyn – ekologııalyq ahýal. Osy oqıǵa 13 naýryzda bastaldy, sol kúnnen bastap, Mańǵystaý oblysy boıynsha Ekologııa departamenti tekseris jumystaryn bastady. Sonymen qatar, onyń jyljymaly zerthanasy kúndelikti Qalamqas ken ornynda monıtorıng jasaýda. Ol birinshiden, aýany tekserý. Aýanyń sapasyn, ilespe sýdyń sapasyn jáne topyraqtyń sapasyn tekseredi. Sondyqtan, monıtorıng kúndelikti júrgizilýde jáne 4,5 shaqyramnan keıin Kaspıı teńizi bar. Soǵan baılanysty, Qazgıdromet Kaspıı teńiziniń jaǵalaýyna da monıtorıng jasaýda», - dep málimdedi QR Energetıka vıse-mınıstri Sabıt Nurlybaıuly Ortalyq kommýnıkasııalar qyzmetinde.
Onyń aıtýynsha, qazirgi ýaqytta turǵyndarǵa tónip turǵan eshqandaı qaýip joq.
«Osy ken ornyna eń jaqyn aýyl – 70 shaqyrymdaǵy Shebir aýyly. Odan keıin Qazan aýyly 80 shaqyrym jerde ornalasqan. Turǵyndarǵa ekologııalyq jaǵdaı áser etetin eshqandaı ahýal joq», - dedi Sabıt Nurlybaıuly.
Sonymen qatar, kúndelikti tekseristiń nátıjıesinde ekologııalyq jaǵdaı áli de baqylanyp, arnaıy sharalar qabyldanbaq.
Aıta ketsek, 13 naýryzda Mańǵystaý oblysyndaǵy «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS jobalyq tereńdigi 903 metrlik №8237 uńǵymasyn burǵylaý barysynda gaz-sý qospasy atqylap, tótenshe jaǵdaı bolǵan edi.