Elorda ákimi men densaýlyq saqtaý mınıstri ár pasıenttiń hal-jaǵdaıyn bildi, dep habarlaıdy qalalyq ákimdiktiń resmı saıty.
Búgin Nur-Sultan qalasynyń ákimi Baqyt Sultanov pen QR Densaýlyq saqtaý mınıstri Eljan Birtanov keshe iri jol-kólik oqıǵasynyń saldarynan zardap shekken azamattar em qabyldap jatqan qalalyq №2 kópbeıindi aýrýhanada bolyp qaıtty. Elorda ákimi men densaýlyq saqtaý mınıstri ár pasıentke baryp, onyń hal-jaǵdaıyn surastyrdy. «Tezirek jazylýyńyzdy tileımin. Sizge biliktiligi joǵary úzdik dárigerler kómek kórsetip jatyr. Aıyǵyńyz!», – dedi Baqyt Sultanov.
Aýrýhananyń bas dárigeri Ivan Lıdiń aıtýyna qaraǵanda, qazir stansıonarda 13 adam em qabyldaýda. Olardyń segiziniń jaǵdaıy ortasha (olar travmatologııalyq bólimde emdelýde). Eki pasıent keýde bóliginiń hırýrgııasy bóliminde. Úsh adamnyń jaǵdaıy aýyr. Olar jan saqtaý bóliminde jatyr. «Keshe biz ómirge qaýip tóndiretin belgiler boıynsha 5 ota jasadyq. Bul óte kúrdeli operasııalardyń spektri boldy. Atap aıtqanda, ishastar ishine qan ketýdi toqtatý, meljemdelgen aıaq-qoldyń metalloosteosıntezi, ampýtasııa sııaqty otalar. Bir áıeldiń aıaǵyna, ókinishke oraı, ampýtasııa jasaýǵa májbúr boldyq», – dep málimdedi Ivan Lı.
Aýrýhananyń bas dárigeriniń aıtýyna qaraǵanda, keıbir pasıentter uzaq em qabyldaýy kerek. Al endi birin 7-10 kúnnen keıin úıine jiberedi. Budan buryn habarlaǵanymyzdaı, keshe tańerteń Qabanbaı batyr dańǵylynda 3 avtobýs pen birneshe jeńil kóliktiń qatysýymen jol kólik oqıǵasy oryn alǵan bolatyn.
Qala mańyna qatynaıtyn № 303 baǵdarly avtobýs № 12 baǵdarly avtobýsty soqtyǵysqan-dy. JKO-nyń nátıjesinde eki adam mert bolyp, túrli jaraqat alǵan 36 adam aýrýhanaǵa jatqyzyldy. Elorda ákimi apat saldarynan qaza bolǵan azamattardyń otbasylaryna kóńil aıtyp, tıisti organdarǵa olarǵa jáne apattan zardap shekkenderge jan-jaqty kómek kórsetýdi tapsyrdy. JKO-nyń sebepteri anyqtalyp jatyr.