62 jastaǵy er adam juqa muz astyna qulap ketti dep habarlaıdy elorda ákimdiginiń resmı saıty.
Oqıǵa keshe, 26 naýryzda QazMZÝ ýnıversıteti mańynda boldy. «Saǵat 18:00 shamasynda «Talas 201» quramyndaǵy leıtenant Rýslan Búrkitbaev pen polısııa aǵa leıtenanty Dáýlet Ábýov JBO-nan ýnıversıtet artyndaǵy Esil ózeninde er adamnyń batyp bara jatqandyǵy týraly aqparatty aldy. 5 mınýt ishinde olar oqıǵa ornyna jetti», – dep habarlaıdy qalalyq polısııa departamentiniń baspasóz qyzmeti.
Oqıǵa ornyna jedel jetken TJD qyzmetkerleri men polıseıler sýǵa batyp bara jatqan adamdy qutqardy.
«TJD qyzmetkeri muz ústinde er adamǵa jaqyndap, ony arnaıy arqanmen baılady. Tartylý barysynda, salmaqqa shydamaı, muz jarylyp, TJD qyzmetkeri jáne polıseı er adammen qosa sýǵa qulady. Sol sátte basqa polıseıler kómekke kelip, úsh adamdy sýdan alyp shyqty», – delingen habarlamada.
62 jastaǵy er adamǵa alǵashqy medısınalyq kómek kórsetilip, ol aýrýhanaǵa jetkizildi. Medısınalyq kómek sýda qalǵan qutqarýshy men polıseıge de qajet boldy. «Qazir ózende muz álsiz, muz ústimen ótýdiń qaýipti ekenin eske salǵymyz keledi. Saqtanyńyzdar!», – dep eskertti qalalyq polısııa departamenti.