Erteń alǵash ret elimizde Qazaq ulttyq qyzdar pedagogıkalyq ýnıversıtetinde ulttyq muramyzdy ulyqtaýǵa baǵyttalǵan «Kıeli besik» respýblıkalyq mýzyka festıvali bastalady.
– Bilim men ǵylymnyń qarashańyraǵy Qyzdar ýnıversıtetiniń bastamasy alǵash ret uıymdastyrylyp otyrǵan «Kıeli besik» respýblıkalyq mýzyka festıvali – ultymyzdyń ulylyǵyn ulyqtap, mereıin tacytýǵa baǵyttalǵan biregeı joba. Bul festıval – babadan balaǵa mıras bolyp kele jatqan ulttyq qazynalarymyzdy qadirleýge, jastardy otbasylyq qundylyqtardy qurmetteýge úndeıdi. Qazaq elinde turatyn túrli etnos ókilderi men halyqtardyń salty men tól mádenıetin nasıhattaýǵa baǵyttalǵan bul shara aldaǵy ýaqytta da dástúrge aınalatynyna kámil senimdimiz, – deıdi ýnıversıtettiń О́ner jáne mádenıet fakýltetiniń dekany Gúlnur О́mirbaeva.
Festıvalǵa elimizdegi túrli ult ókilderiniń qoǵamdyq birlestikteri men joǵary jáne orta arnaýly oqý oryndarynyń stýdentteri, mektep oqýshylary qatysady dep kútilýde. Baıqaý eki kezeńnen turady. Alǵashqy týrda qatysýshylar besik taqyrybynda teatrlandyrylǵan qoıylymdy kópshilik nazaryna usynsa, ekinshi kezeńde «Kıeli besik» taqyrybyndaǵy halyq ánderin oryndamaq. Olardyń qatarynda besik jyrlary, ana áldıi jáne besik týraly ánder bar.
Qatysýshylardyń óneri teatr qoıylymynyń aqparattyq nasıhattalýy, buryn zerttelmegen tyń ıdeıany kórsetý, dekorasııa, kostıým jáne akterlik sheberlik syndy baǵyttar boıynsha baǵalanady. Al mýzykalyq baǵytta ánniń sózi men áýeniniń sapalylyǵy, shyǵarmanyń kúrdeliligi, oryndaýshynyń sahnalyq kıim úlgisi men mádenıeti nazarǵa alynbaq.
Festıval jeńimpazdary arnaıy dıplomdarmen jáne baǵaly syılyqtarmen marapattalady.
Aınash ESALI,
«Egemen Qazaqstan»
ALMATY