QR Qarýly Kúshteri Bas shtaby Bastyǵynyń nusqaýyn júzege asyrý jáne mamandardyń kásibı daıarlyǵyn tekserý maqsatynda, QR QK Raketa áskerleri men artıllerııa áskerleriniń qolbasshysy polkovnık Asqar Jolamanovtyń basshylyǵymen «Shyǵys» óńirlik qolbasshylyǵynyń áskerı polıgony aýmaǵynda alǵash ret Qurlyq áskerleriniń mınomet batareıalarynyń jarysy ótti.
Semeıge arnaıy kelip synǵa túsken «Shyǵys», «Batys» jáne «Ońtústik» óńirlik qolbasshylyqtarynan 120-dan astam áskerı qyzmetshiler, ıaǵnı 5 mınomet batareıleri jarystyń úsh kezeńinde ózderiniń teorııalyq bilimderi men tájirıbelik daǵdylaryn kórsetý úshin irikteldi,-dedi «Shyǵys» óńirlik qolbasshylyǵy baspasóz qyzmetiniń jetekshisi, aǵa leıtenant Islambek Qaldybekov,-birinshi kezeń «Atys», onyń barysynda batareıalar jalpy komandalyq nátıjemen eń kóp ball jınaıtyn batareıany anyqtaý úshin AK-74-ten 4 baqylaý atý jattyǵýlaryn oryndady. Ekinshi kezeń «Arnaıy» dep ataldy. Áskerı qyzmetshiler arnaıy daıyndyq boıynsha ózderiniń bilimderin kórsetti. Bólimshe quramynda jáne jeke óz mamandyqtary boıynsha synaqtar men normatıvterdi tapsyrdy. Úshinshi kezeń «Batareıanyń atýy», jarystyń qorytyndy kezeńinde jeke quramnyń áreketin soǵys jaǵdaıyna maksımaldy jaqyndatý úshin jeńil brondalǵan kóp maqsatty tartqyshynda (MTLB) ot pozısııasyn aýystyra otyryp nysanalardan ártúrli qashyqtyqtan mınometten kózdep atý.
Jarys qorytyndysy boıynsha birinshi orynǵa «Shyǵys» óńirlik qolbasshylyǵynyń 27943 áskerı bóliminiń mınomet batareıasy, ekinshi orynǵa «Ońtústik» óńirlik qolbasshylyǵynyń 74884 áskerı bóliminiń mınomet batareıasy, úshinshi orynǵa «Batys» óńirlik qolbasshylyǵynyń 30238 áskerı bóliminiń mınomet batareıasy shyqty.
Raýshan NUǴMANBEK
«Egemen QAZAQSTAN»
SEMEI