Parlament Senaty Ekonomıkalyq saıasat, ınnovasııalyq damý jáne kásipkerlik komıteti Qazaqstan Prezıdentiniń «Qazaqstandyqtardyń ál-aýqatynyń ósýi: tabys pen turmys sapasyn arttyrý» halyqqa Joldaýynyń aıasynda tabıǵı monopolııalar sýbektilerin retteý, baǵa belgileý jáne ınvestısııalyq mindettemelerdi memlekettik baqylaý máseleleri boıynsha elimizdiń Ulttyq ekonomıka mınıstrliginiń basshylyǵymen kezdesti. Bul týraly Parlament Senatynyń baspasóz qyzmeti habarlady.
Komıtet tóraǵasy Asqar Beısenbaev sharany asha kelip, Ult kóshbasshysy N.Nazarbaev Qaýipsizdik Keńesiniń otyrysynda kommýnaldyq qyzmetter baǵasynyń joǵary ekenin atap ótkenin, sondaı-aq ótken jylǵy Joldaýda aıtylǵan elektr men jylý energııasynyń qazirgi tarıfterin qalyptastyrý jáne monopolısterdiń ınvestısııalyq mindettemelerin baqylaý jónindegi ózekti máselelerge nazar aýdardy.
Senator S.Eńsegenov Parlament tabıǵı monopolııalar sýbektileriniń qyzmetiniń ashyqtyǵyn arttyrýǵa jáne tarıftik esep-qısaptar men ınvestısııalyq baǵdarlamalardy iske asyrýdy baqylaýdy kúsheıtýge baǵyttalǵan «Tabıǵı monopolııalar týraly» zań qabyldaǵanyn atap ótti. Odan basqa, Parlament depýtattary bıznes-ortany jáne saýda qyzmetin damytý týraly zań aıasynda tabıǵı monopolııalar sýbektileri men áleýmettik mańyzy bar naryqtar qyzmetterine baǵalardyń ósýin shekteýge baǵyttalǵan erejelerdi usynǵan bolatyn.
Mınıstrdiń orynbasary S.Jumanǵarın óz baıandamasynda tabıǵı monopolııalar sýbektileri qyzmetiniń negizgi kórsetkishteri men baǵa belgileýdi jáne ınvestısııalyq mindettemelerdi memlekettik baqylaýdy jetildirý jónindegi ýákiletti organ qabyldaǵan sharalar týraly habardar etti. Osy jumystardyń nátıjesinde jylýmen jabdyqtaý, sý jetkizý, káriz, elektr jáne gazben qamtamasyz etýge arnalǵan kommýnaldyq qyzmetterge tarıfter tómendetilgeni aıtyldy.
Sharaǵa qatysýshylar tabıǵı monopolııalar sýbektileriniń basqa da máselelerin, kórsetiletin qyzmetterdiń baǵasyn belgileý tártibin, ınvestısııalyq baǵdarlamalardy iske asyrýdy, sondaı-aq osy saladaǵy memlekettik retteýdiń tıimdiligin arttyrýdy talqylady.
Kezdesýdiń qorytyndysy boıynsha Komıtet qatysýshylardyń eskertýlerin eskere otyryp, tabıǵı monopolııalar sýbektilerin retteýdi jetildirýge, baǵa belgileýge jáne ınvestısııalyq mindettemelerdi memlekettik baqylaýǵa baǵyttalǵan usynystar ázirleıtin bolady.