Baıqaýdyń negizgi maqsaty – mýzykalyq jáne shyǵarmashylyq daryny bar balalardy anyqtaý jáne qoldaý kórsetý, olardyń shyǵarmashylyq áleýetin júzege asyrýǵa jáne bolashaqta talap-qabiletterin damytýǵa kómektesý. Baıqaýdyń birinshi maýsymynan bastap balabaqsha men mektepterge keńinen tarap ketken 56 jańa án jazyldy, irikteý kezeńderine 20 156 bala qatysyp, televızııalyq efırlerde 12 konserttik shoý, 24 kúndelik, 128 beınerolıkter kórsetildi. «Bala daýysynyń» kóptegen túlekteri qazirgi tańda «Jandaný álemi» Qorynyń qoldaýymen mýzykalyq mektepter men kolledjderde tálim alýda. Baıqaýdyń irikteý kezeńderiniń elimizdiń barlyq óńirlerinde ótýi «Bala daýysynyń» biregeıligi bolyp tabylady.
Almaty qalasynyń ánshi balalary asyǵa kútken baıqaýdyń bıylǵy irikteý synyna jastardyń súıikti ánshisi Álı Oqapov pen zamanaýı mýzyka sarapshysy, ánshi Farıda Nııazova tálimgerlik jasady. Bıylǵy baıqaýdyń irikteý kezeńiniń synyna Almaty qalasynan 600-den astam bala qatysty. Taýdaı talappen kelgen ár bala ózinshe daryndy da. «Bala daýysy» ulttyq án baıqaýynyń uıymdastyrýshysy Tolǵanaı Hasenovanyń aıtýynsha, bıylǵy baıqaý jańa formatta ótedi. Baq synaıtyn balaǵa da, báıgege baptap qosqan ata-anaǵa da qobaljýdyń qajeti joq – baıqaý ashyq ári ádil júrgiziledi. Basty shart – osy. Irikteý synynda ár bala óziniń vokaldyq qabiletin kórsetetin jáne qalaǵan tildegi úsh ándi shyrqady. Jalpy shyǵarmashylyq top 29 naýryz ben 22 mamyr aralyǵynda 8 jáne 12 jas aralyǵyndaǵy naǵyz talanttardy tańdaıdy.
«Bala daýysy» sııaqty respýblıkalyq deńgeıdegi án baıqaýynyń bolýy kishkentaı órender úshin mańyzdy ári qajetti. Sebebi bolashaqta mýzyka baǵytyn tańdaıtyn búldirshin bala kúninen tájirıbe jınaqtap, túrli daıyndyq satylarynan ótedi. Mundaı jobalardyń túıini – tanymaldylyq. Kishkentaı ánshiler degenimizben, bul – shyǵarmashylyq, bul – mýzyka, bul – óner. «Bala daýysy» jobasyna bıyl úshinshi jyl tálimgerlik jasap otyrmyn. О́tken jyldary Oral jáne Qyzylorda qalalaryndaǵy baıqaýda tálimger bolǵanmyn. Budan bólek «Golos – detı Kazahstana» jobasynda da qazylyq jasaǵan bolatynmyn. Sol sebepti qabiletti balanyń daýysyn tanyp, ónerin baǵalaýda tájirıbem bar dep oılaımyn. Árıne, biz úshin balanyń daýys qýattylyǵy, oryndaý sheberligi, jalpy vokaldyq qabileti basty másele, degenmen budan bólek balanyń kórermenniń kózaıymyna aınala alatyndaı súıkimdiligi de bolýy kerek. Myńnyń, mıllıonnyń júregin jaýlap alý ońaı emes, jasyna qaramastan ánshiniń sahnaǵa degen ińkárligi, án salýǵa qushtarlyǵy, jigeri, ádemi qımyl-qozǵalysy, artıstızm, osynyń bári de boıynan kórinip turýy tıis. Ár balanyń tek ózine tán qaıtalanbas ereksheligi bolady. Bizdiń mindet – sol erekshelikti taný», deıdi tálimger Álı Oqapov.
Tańǵy 9-dan keshki 7-ge deıin tapjylmaı otyryp, talapkerler arasynan úzdik daýystyń ıesin taný Álı men Farıdaǵa ońaıǵa soqqan joq. Kún uzaq júrgizilgen kastıng nátıjesinde Almaty qalasynyń eń úzdik ánshisi dep 10 jastaǵy Mıras Maksımov tanyldy. Jobanyń aqtyq synyna Almaty qalasynyń atynan joldama alǵan ol elimizdiń barlyq oblys ortalyqtary jáne Nur-Sultan, Almaty, Shymkent qalalarynan júırik shyqqan 17 eń úzdik balanyń qatarynda baıqaýdyń sýper-máresinde án shyrqaıdy. Mırasqa tańdaý bildirgen Á.Oqapov onyń bolashaqta otandyq sahnanyń laıyqty maqtanyshy bolatynyna senim bildirdi. Aqtyq synda búldirshinderdi ádil-qazylar quramyna kiretin qazaq estradasynyń áıgili juldyzdary, tanymal prodıýserler men horeograftar kútedi. Irikteýge kelgen árbir bala estelik syılyqtar men dıplomdarǵa ıe bolyp, baıqaýdyń kúndelikteri túsirilimine qatysady. Balalardyń ata-analary men tálimgerleri de shette qalmaıdy, olardyń qalaýymen baldyrǵandardyń shyǵarmashylyǵyn damytý boıynsha sheberlik saǵattary jáne bala psıhologııasy máseleleri boıynsha keńester ótkiziledi.
Kúz aıynda óz óńirinde úzdik dep tanylǵan elimizdiń eń myqty 17 daýysy «Juldyzdy arman úıinde», Alataýdyń baýraıynda ornalasqan «Bóbek» ulttyq ortalyǵynda bas qosady. Munda jeńimpaz balalardy kúndelikti kásibı mýzykanttar, horeograftar, stılıster baıqaýdyń aqtyq synyna, televızııalyq túsirilimderge daıyndaıdy.
24-26 qazan aralyǵynda Almaty qalasynyń Respýblıka saraıynda ótetin «Bala daýysynyń» sýper-máresinde baıqaý aıasynda jazylǵan jańa ánder shyrqalyp, «Balalyq shaqtyń meıirimdi ǵalamshary» atty spektakl-mıýzıkldiń tusaýkeseri ótedi. Kórermender aqtyq synǵa deıin jetken ónerli balalardyń qatysýymen ótetin qaıtalanbas shoýdyń kýágeri bola alady. Baıqaýdyń barlyq aqtyq kezeńderin kásibı qazylar alqasy jáne onlaın-daýys berý arqyly telekórermender baǵalaıdy.
Barlyq qatysýshylar arnaıy syılyqpen marapattalyp, eń úzdik dep tanylǵan daýys ıesi elimizdiń tańdaýly mýzykalyq bilim ordasynda oqýǵa memlekettik grant jáne Parıjdegi ertegi álemi Dısneılendke saıahat jasaýǵa joldama alady.
Almaty