Bozjaınaq dúnıeniń boıyna nár júgirtken, Naýryz merekesi kúnderi daýysy kókte damyldaǵan Dımashymyz Máskeýdiń Kreml saraıynda án salyp alqalaǵan áleýmettiń aıyzyn bir qandyryp qaıtqan edi. Endi mine, sol sahnada «Astana Opera» teatrynyń balet trýppasy bılemek. Olar aldaǵy sáýir aıynda ótetin «Vaslav Nıjınskıı. Orys baletiniń kemeńgeri» atty ǵalamat gala-konsertke qatysýǵa shaqyrtý aldy. Aıtýly ónerleriniń arqasynda talaı jerdi aralaǵan astanalyqtar onda jahandyq horeografııa jaýharlarynyń biri – áıgili kompozıtor N.Rımskıı-Korsakovtyń mýzykasyna maıtalman horeograf M.Fokın qoıǵan «Sheherazada» baletin aparady. Tasy órge domalaǵan shyǵarmashyl toptyń jetekshisi, Reseı halyq ártisi Altynaı Asylmuratovanyń aıtýyna qaraǵanda, bul sapardyń jóni burynǵylardan bólekteý kórinedi. Eýropa qalalaryndaǵy gastrolderin tabysty aıaqtaǵan talantty ujym osy joly da kórermen kóńilin kónshiterlik deńgeıde óner kórsetýdi kózdep otyr.
Árıne, máıekti mádenı sharanyń mán-mańyzyn arttyrar shyraıly shyǵarmalardyń az bolmasy anyq. Dástúrli bı dýmanyn uıymdastyrýshy Reseıdiń halyq ártisi Andrıs Lıepa iriktegen ilipalarlyq qoıylymdar qatarynda «Uıqydaǵy arý», «Jızel», «Qasıetti kóktem», «Petrýshka», «Talısman» sekildi baletter bar. Degenmen de keremet keshtiń sánin bizdiń ónerpazdar kirgizetinine sengimiz keledi. О́ıtkeni bas-aıaǵy eki bólimnen turatyn baǵdarlamanyń teń jartysy qazaqstandyqtardyń úlesine tıgeli tur.
Talaıdy tamsandyrar tamasha gala-konsertke «Kovent-Garden» Koroldik teatrynyń premeri Vadım Mýntagırov, Sankt-Peterbýrgtegi Marııa teatrynyń sańlaǵy Iýlııa Mahalına, Reseıdiń Úlken teatrynyń prımasy Elenora Sevenard sekildi balet juldyzdary qatysady. Baq ta, bap ta synalatyn básekede Baqtııar Adamjan, Anastasııa Zaklınskaıa, Jánibek Imanqulov, Ildar Shakırzıanov jáne basqa elordalyq jas daryndar jarqyrap kórinerine shek keltirmeımiz.
Talǵat BATYRHAN,
«Egemen Qazaqstan»