Sý basý qaýpi joq

Jıynda sóz alǵan vıse-mınıstr Iý.Ilın elimizdiń keıbir óńirlerine jaýyn-shashyn kóp jaýǵanymen, sý tasqyny boıynsha jaǵdaı qalypty ekenin aıtty. Onyń málimetinshe, qazirgi tańda eldi mekenderdi sý alý qaýpi joq. «О́tken aptada Túrkistan, Jambyl oblystarynda tótenshe jaǵdaılarǵa daıyndyq kúsheıtilip, qosymsha bólimsheler jiberildi. Aqmola, Qyzylorda jáne Soltústik Qazaqstan oblystaryndaǵy top­tardyń jumysyn kúsheıtý úshin orta­lyq qutqarý jasaǵynyń qyz­met­kerleri jóneltildi», dedi ol. 

Sondaı-aq atalǵan vedomstvo ókili tótenshe jaǵdaılardyń aldyn alý boıynsha atqarylǵan naqty sharalarǵa toqtaldy. Aıtalyq, ja­zyq­tyq ózenderde muz ótkeliniń ótýin qamtamasyz etý jáne muz keptelisiniń aldyn alý maqsatynda Shyǵys Qazaqstan, Qaraǵandy, Qostanaı, Soltústik Qazaqstan oblystarynda 26 muz jarý jumysy júrgizilgen. Batys Qazaqstan oblysynda jalpy aýdany 215 myń sharshy metr muzdy kesý jumystary aıaqtaldy.

Iý.Ilın atap ótkendeı, «Qaz­gıd­romet» beretin apta saıynǵy meteorologııalyq boljamǵa sáıkes 1-5 sáýir aralyǵynda Qostanaı, Sol­tús­tik Qazaqstan, Shyǵys Qazaq­stan, Aqmola jáne Qaraǵandy oblystarynda (14-20 mm deıin) jaýyn-shashyn bolýy múmkin, ol jaǵ­daıdy qıyndatýy yqtımal. 

Shara barysynda mınıstrdiń orynbasary Aqmola oblysynyń Býrabaı aýdanyndaǵy Kenesary bógetindegi jaqynda oryn alǵan jaǵdaıǵa da toqtaldy. 30 naýryzda saǵat 19.00-de qalyń qardyń erýi saldarynan sý kóterilip, aǵyn sý bógetti buzyp ketken. Iý.Ilınniń aıtýynsha, bógetten tasyp aqqan sý Han ózenine baryp quıylǵan. Sondyqtan Ivanov sý qoımasy jarylyp ketýden aman tur. Ivanov sý qoımasynyń mańynda Ivanovo eldi mekeni bar. Kókshetaý qalasy men Ivanovony sý basý qaýpi joq.

Atalǵan vedomstvo ókiliniń aqpa­ratyna súıensek, 25-31 naýryz aralyǵynda Aqmola, Shyǵys Qazaq­stan, Batys Qazaqstan, Soltústik Qa­zaq­stan jáne elordanyń aınala­syn­daǵy eldi mekenderden 440 myń tekshe metr qar sýy soryldy, ózen deńgeıiniń kóterilýi saldarynan aýyldardy sý basý faktileri tirkelmegen.

Aıdana ShOTBAIQYZY,

«Egemen Qazaqstan»