Qalada ǵana emes, dalada da seldiń qaýpi seıilgen joq. Qaıta qar jańa erip, qaterdi molaıta túsýde. Sáýir týysymen Esil, Moıyldy, Jabaı, Sileti, Shaǵalaly, Qalqutan ózenderi men astana sý qoımasyndaǵy sý deńgeıi kóterile bastady. Jylǵa-jylǵamen qýalaı aqqan sý qaramy mol. Ústimizdegi jyly qar qalyń tústi. Ylǵal qorynyń kólemi normadan 70 prosentke deıin kóp. Sý sińe qoıady deıtindeı jerdiń ústińgi qabaty da jibigen joq. Qaýip tóngen soń Qazaqstan Respýblıkasy sý resýrstary jónindegi komıtet sý qoımalarynan artyq sýdy aǵyzýdy usynyp otyr. О́tken táýlikterde kún 2-7 gradýsqa jylynyp, 1,4 mılımetr jaýyn-shashyn tústi. Jalpy óńirde ótken aptada 40 mılımetr shamasynda jaýyn jaýyp, qarǵyn sýdy molaıta tústi. Oqyrmanǵa túsinikti bolýy úshin bul kórsetkishtiń aılyq normadan 74 prosent kóp ekendigin aıta ketsek te bolar. Osyndaı sebepten sý kóbeıip, Sileti ózeni boıyndaǵy Bestoǵaı, Prırechen, Esil ózeni jaǵalaýyndaǵy Túrgen eldi mekenderiniń sý astynda qalý qaýpin týǵyzyp otyr.
–Oblys boıynsha aldaǵy úsh táýlikte jańbyr jaýýy múmkin. Kúndiz 12 gradýsqa deıin jyly bolady,–deıdi «Qazgıdromet» respýblıkalyq memlekettik kásiporny Aqmola oblystyq fılıalynyń dırektory Baqyt Maqajanova,–Zerendi, Býrabaı, Bulandy, Birjan sal, Aqkól, Ereımentaý aýdandarynda normadan tys jaýyn jaýady.
Oblys ortalyǵyn ishinara sý basýy Qylshaqty ózeniniń boıymen Ivanovka sý qoımasynan bosatylǵan sýdyń aǵýynan. Boljam boıynsha Ivanovka sý qoımasyna 2-2,5 mıllıon tekshe metr, Kókshetaý qalasyna 1,5-2 mıllıon tekshe metr sý kelýi múmkin.
–Osy jaılarǵa baılanysty qaýipti jerlerge baqylaý beketi ornalastyrylyp, sý deńgeıine turaqty monıtorıng júrgizilýde,–deıdi oblystyq tótenshe jaǵdaılar departamenti basshysynyń orynbasary Manarbek Shapaǵatov,–Kenesary sý qoımasyn qarǵyn sý buzyp ketti. Qazir qaterdiń aldyn alý jáne saldaryn joıýǵa 258 adam men 20 tehnıka jumyldyrylǵan. Oblystyq tótenshe jaǵdaılar departamentiniń jeke quramynan 130 adam jáne arnaıy 5 tehnıka, jergilikti atqarýshy organdardan 40 adam men 5 tehnıka jumys isteýde. Sondaı-aq, ózge de mekemelerden qajetti tehnıka men adamdar bólinip, qaýiptiń aldyn alyp jatyr.
Aqmola oblysy