Munaıly óńirde ekologııalyq ahýal kóńil kónshiterlik emes. Memorandým aıasynda qorshaǵan ortany qorǵaýǵa baǵyttalǵan sharalar kesheni júzege asady. Sondaı-aq, atmosferaǵa ártúrli kózderden túsetin kómirqyshqyl gazyn azaıtý boıynsha ekologııalyq, zertteý jumystary jáne monıtorıng júrgizý úshin áleýmettik tapsyrysty qalyptastyrý da josparda bar. Oblys aýmaǵynda turǵyndardyń ekologııalyq qaýipsizdigin saqtaý maqsatynda tabıǵat qorǵaý baǵdarlamalary men ınvestısııalyq jobalar iske asatyn bolady.
Bul týraly «Ekologııalyq uıymdar Assosıasııasy» zańdy tulǵalar birlestiginiń tóraǵasy Aıgúl Soloveva aıtty. «Memorandým aımaqtyń ekologııalyq problemalaryn sheshýge septigin tıgizedi. Problemalyq máseleler bar, olardy sheshý úshin álemdik tájirıbemen bólisýge daıynbyz. Qazir jańa ekologııalyq Kodeks boıynsha jumys istep jatyrmyz»,- dedi Aıgúl Soloveva.
Atyraý oblysynyń ákimi Nurlan Noǵaev ekologııalyq problemalardy birlesip sheshý úshin bul memorandýmnyń mańyzdy ekenin atap ótti. «Jer qoınaýyn paıdalanýshy kásiporyndardyń qorshaǵan ortaǵa áserin tómendetý boıynsha keshendi jumystar júrip jatyr. Balamaly energetıka bizdiń óńirde de engizilýde. Isataı aýdanynda qýaty 52 megavatt alǵashqy jel elektrsansasy salynyp jatyr. Oblystaǵy sý aıdyndarynda ekologııalyq sıpattaǵy problemalar bar. Bul máselelerdiń bárin qoǵamdyq uıymdardy jumyldyrý arqyly jarııa túrde sheshýimiz kerek», - dedi Nurlan Noǵaev.
Atyraý