Kelýshiler nazaryna usynylǵan keskindeme, grafıka, músinder alýan túrli taqyrypty qamtyǵan. Dástúrli emes tehnıkamen qatar sýret salýdyń akademııalyq tásilderi de qoldanylǵan eksponattardyń basym bóligi týǵan ólke tabıǵatynyń sulýlyǵyn, elimizdiń mádenıeti men salt-dástúriniń ozyq úlgilerin kórsetýge tyrysqan.
Jergilikti balalar óner mektebiniń dırektory Záýresh Kojýhovanyń aıtýynsha, mundaı kórmeler Saran qalasynda jıi ótkizilip turady eken. «Jeltoqsan aıynda Saran 65 jasqa tolady, al bizdiń mektep óziniń 60 jyldyq mereıtoıyn atap ótpekshi. Qazirgi tańda mektebimizde 950 bala oqıdy. Biz bul kórmeni súıikti qalamyz ben mektebimizdiń mereıtoıyna arnaımyz», deıdi ol.
Kórmeni uıymdastyrýshylar usynylǵan shyǵarmalardyń qazirgi zamanǵy dúnıetanymdy qalyptastyrý, kólemdik-keńistiktik jáne abstraktili oılaýdy damytý, óskeleń urpaqtyń kórkemdik talǵamyn tárbıeleý isinde taptyrmas qural ekenine erekshe mán berdi.
QARAǴANDY