Qostanaılyq kásipker Galına Shnaıder óńirde kún energııasy men jeldi bıznes qajetine tuńǵysh paıdalanǵandardyń biri. Stýdentter men kásibin endi bastaǵandar úshin ol qala irgesindegi ózi basqaratyn «Zolotoı fazan» meıramhana-qonaq úı keshenine ekskýrsııa uıymdastyrdy. Kásipkerdiń «Tálimgerdiń ustanymdaryn úıretetin jobalyq oqý» kýrsy sheńberinde áńgimesin О́.Sultanǵazın atyndaǵy Qostanaı memlekettik pedagogıkalyq ýnıversıtetiniń stýdentteri tyńdaýǵa asa qyzyǵýshylyq bildiripti. О́ıtkeni jaqynda ǵana oqý ordasynda «U – SMART» bıznes-ınkýbator ashylǵan bolatyn. Ekinshiden ýnıversıtette daıyndalatyn bolashaq týrızm mamandary bilimin kásipkerler tájirıbesimen tolyqtyryp otyrýdy maqsat tutady.
«Meniń startaptarym taqyr jerden bastaldy desem bolady. О́zińe qolaıly, erkin sezinetin ornyńdy, isińdi taýyp alý – bıznestegi jarty tabysyń bolyp tabylady. Men arzan baǵamen satylatyn syılyqtar dúkenin ashtym. Bul naǵyz qyzyqty syılyqtardyń aınalymyna aınaldy, toqtamaı jumys isetýine bolady.Sosyn art-kafe ashý oıyma keldi. Ol jerde adamdardyń rýhanı serpiletin qyzyqty keshter ótkizýine jaǵdaı jasaǵym keldi. Odan oıyma meıramhana-qonaq-úı keshenin ashý týraly oı kele qaldy da, osymen áýre bolyp kettim» deıdi Galına.
Munda kelgen soń, kásipker jańa jobasyn «jasyl tehnologııany» paıdalanýdan bastady. О́ıtkeni ony bul iske qarjyny únemdeý isi ıtermeledi. Paıdalanǵan elektr energııasynyń aqysyn tóleý ońaı emes edi. Ol dızeldi generator ornatyp kórdi, biraq onyń shyǵyny da az emes eken. Aqyrynda «jasyl tehnologııaǵa» toqtady.
«Áýelde men kún batareıalaryn kórdim. 2014 jyly Qytaı óndirisi shyǵarǵan panelder satyp aldym, odan keıin Bolotovtyń jel generatoryn aldym. Bul ekeýi bir júıe retinde jumys isteıdi. Qazir elektr energııasy úshin burynǵydan eki ese kem tóleımin. Aldaǵy ýaqytta osy jerden, tabıǵat aıasynan ekoetonopark, ıaǵnı taza ekologııalyq materıaldardan jasalǵan shaǵyn kıiz úıler qalashyǵyn ornatýdy oılastyryp júrmin» dep bıznes-ledı Galına stýdentterge óziniń aldaǵy josparyn bólisti.
Galına Shnaıder startaperlermen taǵy bir qyzyqty bastamasyn bólisti. Ol osy jerden zoobaq ashyp, ony bilikti kásipkerdiń qolyna tabystaǵysy keletinin aıtty. Bıznes-ledı stýdentterge memleket kásipkerlerge jasap otyrǵan jaǵdaıdy, qolyńa ustatyp otyrǵan «quraldardy» tıimdi, ýaqytynda paıdalanyp úırený kerektigin aıtty. О́ıtkeni Galınanyń ózi birneshe ret nesıeler men granttar alyp sátti, tıimdi paıdalana bildi. Bul oraıda startaperlerge oblystyq kásipkerler palatasyndaǵy bıznes-jattyqtyrýshy Alena Israpılovanyń berer kómegi kóp.
«Bizdiń tyńdaýshylarymyzdyń arasynda daıyn bastamalary men qyzyqty jobalary bar kisiler kóp. Olardy tek durys baǵyttaı bilý kerek. Bıznes qanattasqanda damıdy. Galına Shnaıderdi bastamalary taýsylmaıtyn naǵyz tálimger deýge bolady. Ol jas kásipkerlerge bilgenin úıretýden, aıtýdan jalyqpaıdy, tipti talaptylarǵa óziniń jobasyn júzege asyrý úshin kómek retinde oryn da berip júr» deıdi Alena.
Bıznes-ledıdiń stýdenttermen kezdesýi týrızmdi damytýdy armandaıtyn bolashaq kásipkerlerdiń oıyna ushqyn tastaǵandaı boldy.
Qostanaı