Bara jatyr
Qaıqań joldar bara jatyr dıdaryńdy kórýge, Raýshan gúlder bara jatyr qushaǵyńa enýge. Sulý sóz de bara jatyr júregińde erýge, Jyly jel de bara jatyr mańdaıyńnan óbýge.
Kóbelekter bara jatyr burymyńa qonýǵa, Kóleńkeler bara jatyr saǵan saıa bolýǵa. Aq ulpa qar bara jatyr erý úshin qolyńda, Appaq úmit bara jatyr júrý úshin sońyńda.
Ásem qaıyq bara jatyr seni aıdynda terbeýge, Sansyz oılar bara jatyr seni kúnde tergeýge. Júırik kúnder bara jatyr seni muńnan emdeýge, Qyzyl jalyn bara jatyr janaryńda sónbeýge.
Túmen shattyq bara jatyr qoltyǵyńnan demeýge, Juldyz tartyp bara jatyr turý úshin tóbeńde. Taýlar saǵan bara jatyr túsirmeýge tómenge, Arman saǵan bara jatyr qýanyshqa bóleýge.
Murat júıtkip bara jatyr shyǵaram dep asýǵa, Suraq uıtqyp bara jatyr álemińdi ashýǵa. Baq ta senip bara jatyr qalý úshin basyńda, Baqyt jelip bara jatyr bolý úshin qasyńda!
Qar erigen
Kezdesken shaq. Nurly sát. Qar erigen, Qar erigen qarsy alǵan álemimen. Qoınymda qushaq-qushaq shattyq turdy, Moınyńda oınap turdy ádemi meń...
Bir shýaq taraǵanda júz, óńinen.
Toń jibigen, júrekte muz erigen.
Tańǵy shyqtaı tap-taza ańsarym men,
Yqylasymnan yp-ystyq qyz erigen.
Appaq qyzdyń alǵaýsyz tileginen,
Qolymdaǵy nart qyzyl gúl erigen.
Ańdap qalǵam men sonda sezim jasy.
Syrǵyp bara jatqanyn júreginen.
Qos júrektiń yntyzar sáleminen.
Ebil-debil egilip, jan erigen.
Mekeninen sezimniń kóshtik qalaı?
О́shtik qalaı mezgildiń bádeninen?!
Shýaq qaıda sondaǵy syzdy eritken.
Qýat qaıda boıdaǵy qyzdy elitken?!
Qar erise qaǵamyz nege dirdek?
Qar erise tońamyz biz nelikten?
Qoshtasqan shaq. Muńdy sát. Qar erigen,
Kóńil qaıtqan, jańylǵan áýeninen.
Erýdeı-aq, erippiz ol da, men de.
Eshteńe joq, eshkim joq, bári erigen...
Balkonymda ǵana aqynmyn
Shabyt túzde menen aýlaq, Balkonymda ǵana aqynmyn. Turam ylǵı óleń aýlap, Qushaǵynda qara túnniń.
Bul qalanyń lezde jadym, Kóshiredi myń-myń túsin. Kóshedi ońaı kezgen aǵyn, Tunshyqtyrǵan qyz kúlkisin.
Túrter meni mazdap kelip, Uıqastardyń kerýeni. Bárin tizip jazbaq bolyp, Qara qalam eliredi.
Nópir oılar kelgenimen, Jaraspaıdy kóńil tasqan. Sol uıqastar kerýenimen, Jarar edi men uıqassam...
Juldyz kókten bal ashady, Sol juldyzǵa samǵaıdy arman. Jazsańshy dep jel ashady, Kitabymdy tolmaı qalǵan.
Bolsa-daǵy bul maýsym bap, Kúıde emespin kúı tilerdeı. Almatyda týǵan shýmaq, Astanada uıqy bermeı.
Ár óńimde tús kórem men, Demegende názik shydam. Aq paraqqa túspegenmen, Júıkeme jyr jazyp shyǵam.
Qushaǵynda qara túnniń, Turam ylǵı óleń aýlap. Balkonymda ǵana aqynmyn, О́leń túzde menen aýlaq!
Aýadan aqsha jasaıtyn adam (Ballada)
Saǵym ǵana buldyrap laýlaıtuǵyn, Mań daladan ózge eshkim barmaıtuǵyn. Aınaldyra bir kúni qaqty qazyq, Biz biletin Aınabek almaı tynym. Jaralǵandaı quryshtan táni múldem, Qyzǵan saıyn jumysy jany kirgen. "Aıdaladan aq otaý tigem deı me?", Ne kórindi buǵan dep bári kúlgen. «Alysyńdar, alyssań basqamenen», Dep egesin Aınabek bastap eren. Táýekelden qashpaımyn qara da tur, Men aýadan jasaımyn aqsha degen. Janarynan bir jalyn ushqyndaǵan, Sol adamǵa ózgeler pysqyrmaǵan. Qý daladan kórermiz paıda tapsań, Kúlgender kóp, mazaqtap mysqyldaǵan. Maqsatynan aınymaı ol áýelgi, Aýa kóshken údere qalaǵa eldi. Shyǵaryp sap bappenen shyrt túkirip, Jalǵyz ózi japanda qala berdi. *** Igilikke jetetin tańdy sanaı, Ol qıynnan túzdi abat joldy solaı. Boran menen jaýynǵa arqa tosyp, Atyraptan saryaljyn saldy saraı. Buryp ákep tentekteý taý bulaǵyn, Mańaıyna qaptatty taldy qalyń. Shıpajaıy jansebil Aınabektiń, Áıgilenip, barshaǵa boldy málim. Aspanynan kúdiktiń bulty arylǵan, Aıdaı arý ólkege gúl taǵynǵan. Kórmek bolyp, shattyqqa enbek bolyp, Shalǵaıdaǵy qaladan jurt aǵylǵan. Qoınaýyna qyzyqtyń boldy ener kún, Az-aq kúnde elendi eńbegi erdiń. Aınabekke kúlgender júrdi ishinde, Aýa tappaı qaladan kelgen eldiń. Degen oımen irgemdi jaılaıdy qut, Tosqan tańyn qarsy aldy talmaı kútip. Al adamdar júr munda Aınabekten, Satyp alǵan aýany toımaı jutyp... *** Tur qasqaıyp jýynǵan shyqpen jańa, Aýa izdegen adamdy kútken dala. Túý alysta kúrkildep jóteledi, Kók tútinnen ókpesi bitken qala!
Qyrsyq
Men jaqsy óleń jazar kezde unaǵan, Sháı ishýge shaqyrady bir aǵam. Jalǵan kúlip otyramyn aldynda, Jyrlarymdy jubata almaı jylaǵan.
Tóger sátte bir tylsym jyr tasqynyn, Jınalysqa shaqyrady bastyǵym. Berekemdi qashyrady qaradaı, Merekelik sharalar dep basty muń.
Men jaqsy jyr jazar kezde duǵaly, Azyq-túlik bitedi de turady. Jetedi yntyq ala sómke qaryma, Ketedi úrkip shabytymnyń pyraǵy.
Men jaqsy óleń aýlar kezde qur turmaı, Telefonym bezildeıdi bir tynbaı. Kúıbeń kúnniń yńǵaıynan shyǵa almaı, О́leń baǵym qýrap jatyr qulpyrmaı.
Búgin anyq shabytymnyń shyrqary, Tur kóktemniń yńǵaı berip bul tańy. Al jazýǵa otyraıyn, ıá sát, Túý, Esigimdi qaǵyp turǵan kim taǵy?!
Shyramytý
Aıaldama álde, jaǵalaýdan kórdim,
Erttim be eken ony, bálkim oǵan erdim.
Tappaı qalyp turdym júrektegi ornyn,
Shyraıyna qarap shyramyta berdim.
Netken jyly beıne, netken sýyq óńi,
Jaqyn ári alys onyń maǵan joly.
Aıtar ma eken bárin aıdy aýnatsam beri,
Jymııar ma shirkin, jyldy aǵyzsam keri.
Ketti me oǵan óshim, bolǵan syndy dosym,
Bul kelisi qyzyq, bul kelisi tosyn.
Esineıdi aldan es kirmegen keshim,
Esil kúnim be ediń, óshkindegen esim?!
Birde senip qatty, endi birde senbeı,
Sózim bolyp jutań, sezimge erip kóldeı.
Endim oǵan tústeı, kórdim ony óńdeı,
Tanysqym da kelip, tanyǵym da kelmeı.
Ottaı janyp baram, sansyrady sanam,
Eı, kóńilge kelshi, kózimdegi adam.
Taýsylar ma sharam, biter me eken shamam,
Qandaı suraqqoıyp, qandaı jaýap alam?!
Tilegime tunyp, júregime kirip,
Ketse qaıtem jylap, ketse qaıtem kúlip.
Ashylǵandaı bolyp, aradaǵy qulyp,
Janar ma eken úmit, bolar ma eken umyt?!
Elesteı me qashqan, belesteı me qýǵan,
О́mir netken baıaý, ómir netken jyldam.
Oılaryma shomyp, tolqyn bolyp týǵan,
О́zimdi ózim men be, shyramytyp turǵan?!
De-ja-vıý
Kórgen edim buryn bárin,
Kenet nazar aýdarǵanyn.
Dál osylaı burylǵanyn,
Dál osylaı tań qalǵanyn.
Qımaımyn dep sol dalany,
Áńgimesin aıtady álgi.
Sál muńaıyp salǵan áni,
Búgin taǵy qaıtalandy.
Ol otyrdy túsi qashyp,
Eske salyp kúzdiń kúnin.
Dál osy bir ushyrasý,
Bolǵan syndy júz jyl buryn.
Sát qoı dep em keshpeıtuǵyn,
Taǵy mine keziktirdim.
Onyń qazir ne isteıtinin,
Ishteı ǵana sezip turmyn.
Sheshimi joq suraq ár kún,
О́mir syryn bildirmegen.
О́tken kúnin bir adamnyń,
Qaıta súrip júrmin be men?!
Meniń qalashyǵym!
5 jataqhanaǵa barmadym, búgin basqamyn,
Júregim bulqyn.
Bar edi tup-tunyq aspanym,
Bar edi jáýdirkóz bultym.
KazGÝ-de óleńder órgen,
Mekendep jan tórin.
Tur ma eken qulazyp bólmem,
Momaqan balkonym?!
Yǵystyrdy ol jaqtan bizdi,
Almasqan kúmis jal tolqyn.
Saǵyndym jaýraǵan kúzdi,
Jastyqtyń órtin.
Quddy bir móńkigen ózen,
О́tkergen jylym.
Sekildi ushqyndap, basylǵan kezeń,
Murat Shaımaran* shekken shylym.
Sol málim, beımálim alańda,
Árıne, jasanǵan qyz kóp.
Solardyń júreginen tabam ba?
Barsam baıaǵy ózimdi izdep.
Týdyryp júrekten izgi oı,
Bolmady ketý de ońaı.
Sen aıtshy sıregen biz ǵoı,
Súıkimdi toǵaı.
Kóktiń alqymyn jyrtpaı,
Tynbastan seldete jaýdym.
Sosyn bir shókim bulttaı,
Almatydan Arqaǵa aýdym.
San ýaqyt ótipti arada,
Aýlaqqa salǵaly irgemdi.
Tórt jol osy óleń ǵana ma?
Tórt jyldan qalǵan bir belgi?!
*Murat Shaımaran – aqyn, QazUÝ-da sabaq bergen ustazym