Búgin Palata Spıkeri Nurlan Nyǵmatýlınniń tóraǵalyǵymen Májilis Bıýrosy ótti. Onda 30 sáýir men 7 mamyr aralyǵynda depýtattardyń aımaqtarǵa sapary týraly másele qaraldy. Bul týraly Parlament Májilisiniń baspasóz qyzmeti habarlady.
Májilis Tóraǵasy atap ótkendeı, depýtattardyń halyqpen kezdesýlerinde birinshi kezekte, Elbasy Nursultan Nazarbaevtyń áleýmettik bastamalarynyń júzege asyrylý barysy, onyń ishinde, turmysy tómen jáne kópbalaly otbasylardy qoldaý sharalaryna erekshe kóńil bólinedi.
Depýtattar kezdesý barysynda osy baǵytta qabyldanǵan zańnamalyq qujattarmen qatar, jalpy zańshyǵarýshylyq jumystar jóninde baıandaıdy.
Halyq qalaýlylary óndiris oryndarynda, aýylsharýashylyq jáne áleýmettik nysandarda bolyp eńbek ujymdarymen jáne jastarmen kezdesedi, sondaı-aq azamattardyń qoǵamdyq qabyldaýyn ótkizedi dep josparlanýda.
Májilis depýtattarynyń halyqpen kezdesýi oblys, aýdan ortalyqtarymen qatar shalǵaıdaǵy eldi mekenderdi de qamtıtyn bolady.