Bul forým revmatologtarǵa ǵana emes, sonymen birge, ishki organdardy emdeıtin terapevtter úshin de asa qyzyqty. Birinshi kezekte, dıagnostıka sapasy talqylanady, dıagnostıkadan bastap ońaltýǵa deıingi kezeńde aýrýdyń ártúrli satysynda akýsher-gınekolog, mammolog jáne onkologtardyń ózara árekettesý máselesi qarastyrylady. Osteoporoz jáne D dárýmeniniń jetispeýshiligi máseleleri kóterilmek. Bul Kongress Qazaqstannyń densaýlyq saqtaý salasyna zamanaýı dıagnostıka ádisterin endirýge arnalǵan.
Minberden sóz alǵan spıkerler qatarynda Qazaq revmatologtar alqasynyń tóraǵasy, professor Ǵ.Toǵyzbaev, S.Asfendııarov atyndaǵy Ulttyq medısınalyq ýnıversıtetiniń rektory, professor T. Nurǵojın, Reseı Revmatologtar qaýymdastyǵynyń vıse-prezıdenti, akademık V.Mazýrov (Sankt-Peterbýrg), seýldik jetekshi ǵalymdar Dohsik Minn (Do-CiC Mihn), Nackmoon Sung pen Min Heesuk bar.
Koreıalyq dárigerler jıynda revmatızm aýrýlary men julyn ımmýnologııasyn zerthanalyq ádispen baǵalaý, ınnovasııalyq tehnologııalar kómegimen molekýlıarlyq dıagnostıka júrgizý jáne aýtoımmýndyq revmatızm kezindegi júrek-qantamyr aýrýlary asqynýynyń aldyn alý máselelerin kóterip otyr. Qazaq revmatologtar alqasynyń tóraǵasy Ǵ.Toǵyzbaev Qazaqstan revmatologııa salasyna jańa tehnologııalardy tartýdyń keleshegi týraly sóz qozǵady.
Kongress baǵdarlamasy ǵylymı sessııalarǵa, plenarlyq májilister men sımpozıýmdarǵa toly ári mazmundy túrde ótýde. Eki kún boıy qatysýshylar revmatologııanyń ózekti teorııalyq jáne klınıkalyq máselelerin, revmatızmdik aýrýlardy (revmatoıdty artrıt, spondıloartrıt, aýtoqabynýshy aýrýlar, qyzyl jegi, júıeli skleroz, júıeli vaskýlıt, osteoartroz, osteoporoz) dıagnostıkalaý jáne emdeýge arnalǵan zamanaýı klınıkalyq usynymdardy, revmatologııa salasyndaǵy túbegeıli jańa zertteý baǵyttaryn, Qazaqstanda revmatologııa qyzmetin damytý jáne jetildirý keleshegin ortaǵa salmaq.
Qazirgi tańda revmatızm derti kardıologııalyq aýrýlar men onkologııadan keıin múgedektikke shaldyqtyrý jaǵyna úshinshi orynda tur. Revmatızm aýrýyna shaldyqqan naýqastardyń 72%-y eńbekke jaramdy 18-59 jas aralyǵyndaǵy azamattar bolyp tabylady. Aýrýǵa shaldyqqandardyń 65%-yn áıelder quraıdy.
Kongresti Qazaq revmatologtar alqasy QR Densaýlyq saqtaý mınıstrliginiń qoldaýyna súıene otyryp, «Ulttyq medısına ýnıversıteti» AQ birlesip uıymdastyryp otyr.
ALMATY