Jyl saıyn ótip kele jatqan dástúrli jármeńke jastarǵa bilim berý oshaqtarynda qaı sala mamandaryna suranys kóp nemese tapshy ekendigin jáne eńbek ótilinsiz jumysqa ornalasýǵa bolatynyn anyqtaýǵa septesedi. Bir kún boıy megapolıstiń jaıaý júrginshilerge arnalǵan tanymal kóshesi jumys berýshiler men izdenýshilerge arnalǵan dıalog alańyna aınaldy. Joǵary oqý oryndarynyń túlekteri men jumyssyz jastarǵa arnalǵan bos oryndar jármeńkesin Almaty qalasy «Atameken» Ulttyq kásipkerler Palatasyna qarasty «Jas Qadam» Qoǵamdyq qory uıymdastyrdy. Jármeńkege 300-den astam jumys berýshi kompanııa qatysty. Olardyń sapynda «Magnum Cash Carry» saýda jelisi, CRATA halyqaralyq zań fırmasy, DHL, HCK, Creetgo IT-kompanııasy tárizdi kóptegen irgeli ujymdar bar. Shara aıasynda 200-ge tarta bitirýshi túlek atalǵan kompanııalarda taǵylymdamadan ótýge múmkindik aldy. Oǵan qosa jastardyń bızneske degen yntasyn arttyrýǵa baǵyttalǵan semınar sabaqtar ótkizildi. Joba sheńberinde kásipkerlikti damytý, turǵyn úı máselelerin sheshý, psıhologııalyq jáne zańgerlik kómek kórsetý sharalary uıymdastyryldy.
«Tuńǵysh Prezıdentimiz Nursultan Nazarbaev 2019 jyldy Jastar jyly dep jarııalap, jastardy jan-jaqty qoldaýǵa baǵyttalǵan is-sharalar tizbegin saralap berdi. Osy maqsatta jastarǵa arnalǵan túrli jobalar legi iske asýda. Kásiporyndar úshin-bul eńbekke qabiletti halyqtyń eń úzdik ókilderi arasynan bolashaǵy bar mamandardy tańdap alýdyń biregeı múmkindigi. Stýdentter úshin ózin áleýetti jumys berýshilerge usynýdyń ońtaıly joly. Bizdiń mıssııamyz Qazaqstandaǵy jumyssyzdyq deńgeıin tómendetý», deıdi «SelfMade» jobasynyń úıletirýshisi Aıgúl Nısýpova.
Bos jumys oryndar jármeńkesin uıymdastyrý jas mamandarǵa ǵana emes, jumys berýshiler úshin de mańyzdy. «Jastar ózderin qyzyqtyratyn bos oryndar týraly málimet alýǵa, al biz úshin túlekterdiń iskerlik qasıetin baǵalaýǵa zor múmkindik týdyrady» deıdi jumys berýshi uıymdardyń ókilderi.