Alaıda, tap qazir balyqtyń ýyldyryq shashatyn kezeńi bolǵandyqtan, bul máselede qyraǵylyq qajet bolyp tur. Jambyl oblysynda da bul másele qolǵa alynyp, balyq aýlaýshylardy baqylaý jolǵa qoıylǵanymen, báribir zańbuzýshylyqtar oryn alýda. О́ńirde Jaıyq, Ertis, Syrdarııa sııaqty alyp ózender bolmaǵanymen, sý toǵandarynyń ózinde mıllıondaǵan balyq tirshilik etýde. Búginde Jambyl oblysynda 133 sý aıdyny bar. Onyń ishinde 18 sý aıdyny respýblıkalyq, al 115 aıdyn jergilikti mańyzy bar sý qoımalaryna jatady. Qazirgi kezde aǵymdaǵy jyldyń 15 sáýiri men 31 mamyry aralyǵynda balyqtyń ýyldyryq shashý kezeńi bolǵandyqtan, ony aýlaýǵa tıisti mekemeler tarapynan oblys boıynsha tyıym salynyp otyr. Naqty aıtsaq, Jambyl oblysynda balyq resýrstary men basqa da sý janýarlarynyń ýyldyryq shashý jáne kóbeıýi kezeńine baılanysty Bılikól, Bógetkól jáne Aqkól kólderin ózara baılanystyratyn Asa ózeninde jáne onyń saǵalarynda balyq aýlaýǵa tyıym salynǵan. Jambyl oblystyq orman sharýashylyǵy jáne janýarlar dúnıesi aýmaqtyq ınspeksııasy basshysynyń orynbasary Bolat Asambekovtiń aıtýynsha, jergilikti ózenderde tynyshtyq aımaǵyn qurý maqsatynda Tasótkel sý qoımasynan joǵary ornalasqan Shý ózeninde, onyń quımalarynda jáne Talas ózeninde jyl boıy balyq aýlaýǵa bolmaıdy. Sonymen qatar óńirde búginde balyqtardy qorǵaý maqsatynda «Ýyldyryq-2019» naýqany uıymdastyrylýda.
«Atalǵan shara boıynsha óńirdegi orman sharýashylyǵy jáne janýarlar dúnıesi aýmaqtyq ınspeksııasynyń mamandary «Ýyldyryq» sharasy kezinde birlesken túrde qaskóı balyqshylarmen kúresý úshin arnaıy reıdter uıymdastyrýda. Sonymen qatar aǵymdaǵy jyldyń 15 sáýiri men 31 mamyry aralyǵynda balyqty barynsha qorǵaý jumystaryn birlesip atqarý da mańyzdy. «Ýyldyryq» sharasy kezinde balyqtyń ýyldyryq shashý jáne tynyshtyq aımaqtarynda barynsha qoryqshylyq qyzmetter uıymdastyrylyp, olar táýlik boıy jumys ornynda bolady. Aǵymdaǵy jyldyń 10 sáýirinen bastap polısııa qyzmetkerlerimen birge barlyq sý aıdyndaryndaǵy sýda júzý quraldaryn tekserý jumystary júrgizilip, qujattary rettelmegen nemese qujaty múldem joq barlyq sýda júzý quraldary memleket paıdasyna tárkilenip alynsyn degen sheshim qabyldandy», deıdi Bolat Dáýletqululy.
Degenmen de búginde tabıǵat baılyǵyna qııanat jasaýshy qaskóıler azaımaı otyr. Tipti zańsyz balyq aýlaý derekteri jyl ótken saıyn arta túsýde. Máselen, balyqty qorǵaý zańdylyqtaryn buzǵany úshin aǵymdaǵy jyly 15 sáýirden beri óńir boıynsha 41 hattama toltyrylyp, zańdy belden basqandarǵa barlyǵy 494 myń 900 teńge aıyppul salynǵan. Sonymen qatar Jambyl aýdanynyń aýmaǵyndaǵy Asa ózeninde elektr qarmaqpen zańsyz balyq aýlaǵan eki azamat ustalyp, olardyń ústinen Qylmystyq kodekstiń 335-baby, 3-bóligi 2,4-tarmaqtarymen qylmystyq is qozǵalǵan. Zańsyz balyq aýlaýshylyqtyń saldarynan olar memleketke 575 myń 272 teńge zalal keltirgen. Atqarylyp jatqan jumys nátıjesinde 15 sáýirden bastap «Ýyldyryq» sharasy boıynsha ınspeksııa qyzmetkerleri tyıym salynǵan aýlaý quraldarymen shyqqan 6 balyqshyny ustap, hattama toltyrdy. Nátıjesinde keltirilgen 72 000 teńge zalal mólsheri eseptele otyryp, isteri sotqa joldanǵan jáne 1 qarmaqpen balyq aýlaý faktisi tirkelgen.
Negizi zańsyz balyq aýlaýshylardyń 40 paıyzy Balqash kólinen ustalady eken. Balqash kóli elimizdiń birneshe oblystarymen shektesip jatqandyqtan, munda ózge óńirlerden de balyq aýlaýshylar keledi. О́kinishke qaraı tabıǵattyń baılyǵyn emes, jeke basynyń paıdasyn oılaǵandar búginde de azaımaı otyr. Alaıda, Jambyl oblysynda balyqtyń ýyldyryq shashatyn mezgiline oraı aýlaýǵa tyıym salynýyna baılanysty belsendi jumys júrgizilýde. Sala mamandary zańsyzdyqqa jol bermeý maqsatynda barlyq áreketti jasap baǵýda. Máselen, balyqty tıisinshe qorǵaýdy uıymdastyrý maqsatynda atalǵan ınspeksııa mamandary, oblystyq polısııa departamenti, oblystyq tabıǵı resýrstar jáne tabıǵat paıdalanýdy retteý basqarmasy men №2035 shekara qyzmeti birlesip jumys atqarýda. Alaıda, ár azamat tabıǵat baılyǵyna jaýapkershilikpen qarasa, júgensizdiktiń de joly kesiler edi. Árbir adam zańsyzdyqtyń zardaby kóp ekenin eskere júrse, baılyqtyń kózi balyq ta saqtalyp qalmaq.
Jambyl oblysy