Budan birer jyl buryn Sáýle aýylymen kórshiles qonǵan Qoıtas eldi mekeni údere kóship ketken bolatyn. Kóshken eldiń jurtynda qalǵan Uly Otan soǵysy jaýyngerlerine arnalǵan eskertkishti sol eldiń azamaty, keıin Sáýlege kóship kelgen Sataı Aıbatyrov jańa qonysyna kóshirip ákelip ornatty. Atalaryna degen qurmet, arýaqqa degen taǵzym. О́negeli iske osy eldiń aptal azamattarynyń biri Aıtmuhambet Ǵabbasov bastaǵan aýyl adamdary jumyla kirisip, uıymshyldyq tanytty. Ásirese Býrabaı aýdandyq elektr jelileri bólimshesiniń basshysy Azamat Arǵynbaevtyń eńbegin erekshe atap ótken lázim. Sondaı-aq el azamattary Temirbek, Jamal Smaǵuldar, Nurlan Saǵynaev, Qýanysh Saǵymbaev tárizdi azamattar da birlikteriniń bekem ekendigin ańǵartty.
Eskertkishtiń ashylý saltanatyn ótkizýge aýyldyq okrýg ákimi Ýálıhan Bostanov pen aýyl turǵyndary birlesip qarajat jınady. El ishindegi Jambyl Jaqypov, Bolatbek Tileýkenov, Raıys Hamıdýllın tárizdi kásipkerler qomaqty kómek kórsetti. Eskertkishtiń mańaıy abattandyrylyp, gúl shoqtary qoıyldy.
Ashylý saltanatynda sóz sóılegen aýdan ákimi Ermek Nuǵymanov keıingi urpaqqa úlgi-ónege bolatyn dál osyndaı eńseli isti eńserý el azamattarynyń myqty aýyzbirligin kórsetetindigin, bul eń aldymen el qorǵaǵan erlerdiń arýaǵyna degen qurmet ekendigin tereńnen tolǵap tebirene aıtyp berdi. Arýaqtarǵa baǵyshtalyp quran oqyldy, maıdangerler erligin pash etetin mazmundy konsert qoıyldy.
Endigi arada maıdangerdiń Sáýledegi áıbat eskertkishi jas quraqtaı jaıqalyp ósip kele jatqan jas urpaqtyń kókiregine sáýlesin shashyp turatyn bolady.
Saparbaı PARMANQUL, «Egemen Qazaqstan» Aqmola oblysy,
Birjan sal aýdany