Bıyl ekinshi ret «Akýsherlik, gınekologııa jáne perınatologııa ǵylymı ortalyǵy» AQ ótkizip otyrǵan forým uıymdastyrýshylary qatarynda Densaýlyq saqtaý mınıstrligi men «MedMedıa Qazaqstan» Kongress-operatory bar.
Forýmda «Qazaqstan Respýblıkasynda bosandyrý qyzmetin uıymdastyrý. Máseleler jáne sheshý joldary» taqyrybynda Akýsherlik, gınekologııa jáne perınatologııa ǵylymı ortalyǵynyń dırektory Dınara Myrzahmetova negizgi baıandamany jasap, áıel densaýlyǵyna qatysty elimizdegi ekshelgen málimettermen bólisti.
Reprodýktıvti densaýlyqty nyǵaıtýǵa baǵyttalǵan halyqaralyq jıynda emdik-dıagnostıkalyq sharalardy qoldanýdaǵy ǵylymı jetistikter ortaǵa salynyp, klınıkalyq tájirıbe almasýlar júrip jatyr.
Akýsher-gınekologtardyń ulttyq qaýymdastyǵynyń tóraıymy, professor Nına Qaıýpovanyń aıtýynsha, búkil Qazaqstan boıynsha osy salada kóp jyldar boıy tynbaı júrgizilgen ǵylymı zertteýler zaıa ketken joq. Bul osy salanyń ózekti máselelerin memlekettik turǵyda kóterýge, jetildirýge jol ashty. Ulttyq qaýymdastyqtyń bastamalary da, oǵan qatysty qabyldanǵan memlekettik baǵdarlamalar zańnamalyq turǵyda bolsyn, ekonomıkalyq jaǵynan da jan-jaqty qoldaýǵa ıe boldy.
– Men akýsherlik pen gınekologııa medısınanyń barlyq túrleriniń ishinde tótenshe jaýapkershilikke ıe ekenin aıtýdan jalyqpaımyn. О́ıtkeni bizdiń mamandar adamdarǵa áke men ana ataný baqytyn syılaı otyryp, jańadan týylǵan ómirdiń bastaýynda turady. Akýsher dárigerler eki ómir úshin de jaýap bere otyryp, dúnıege deni saý sábıiń týylýyna qyzmet etedi. Bul maqsat bizdiń búkil ǵylymı izdenisterimiz ben jańa tehnologııalardyń engizilýin aqtaıdy, – dedi Akýsher-gınekologtardyń ulttyq qaýymdastyǵynyń tóraıymy Nına Qaıýpova.
Sonymen II Halyqaralyq forýmǵa 500-ge tarta maman shaqyrylǵan. Forýmǵa elimizdegi búkil akýsherlik, gınekologııalyq jáne perınataldyq ortalyqtardyń ókilderimen qatar, Dúnıejúzilik densaýlyq saqtaý uıymy, IýNESKO ókilderimen qatar, AQSh, Reseı, Ýkraına, Belarýs elderiniń akýsherlik, gınekologııa jáne perınatologııalyq ortalyqtarynyń mamandary men sarapshylary qatysýda.
Forým aıasynda eki kún boıy osy salanyń eń ózekti máselelerine qatysty sheteldik mamandar men otandyq ǵalymdardyń sheberlik dáristeri júredi.